சமூகத்தின் சட்ட விழிப்பறிவுணர்வுக்கான தளம்

நீ வாழ... நீயே வாதாடு... வரவேற்பு வாழ்த்து!

No law, no life. Know law, know life! என்ற நமது அடிப்படைக் கொள்கை தத்துவத்திற்கு இணங்க சட்ட விழிப்பறிவுணர்வின் (அ)வசியத்தை உணர்ந்து, ‘‘நீதியைத்தேடி... சட்டப் பல்கலைக் கழகத்திற்கு’’ வருகை தந்துள்ள உங்களை வருக என வரவேற்று, உங்களுக்கான சட்ட விழிப்பறிவுணர்வைப் பெற்று பயனைப் பெறுக என வாழ்த்துகிறோம்!
முக்கிய அறிவிப்பு : இந்த இணையப்பக்கத்தை புதுப்பிக்கும் பணி நடந்துக் கொண்டிருப்பதால், சில பதிவுகள் அல்லது இணைப்புக்கள் கிடைக்காமல் போகலாம்!

Tuesday, October 31, 2017

நம்மால் மட்டுமே, ‘‘இலஞ்ச, ஊழலை’’ ஒழிக்க முடியும்!




நேற்று 30-10-2017 முதல், ‘‘ஊழல் ஒழிப்பு வாரம்’’ துவங்கி உள்ளது. ஊழல் ஒழிப்பை இந்த ஒருவாரத்தில் மட்டும் பிரதானப் படுத்தினால் போதும் என்பதே, அவர்களின் நிலைப்பாடாக இருக்கிறது.

எனவே, ஊழலைச் செய்வோர், நாங்கள் ஊழலே செய்வதில்லை என்ற வகையில், இதனை மிகப்பெரிய அளவில் நாளிதழ் உள்ளிட்ட ஊடகங்களின் வாயிலாக விளம்பரப்படுத்தி இருக்கிறார்கள்.

மேலும், காரிய அடிமைகளும், கயமைக் கோமாளி களும், வெள்ளையர்களை விஞ்சிய கொள்ளையர் களும் ஆன அரசூழியர்கள், வழக்கம் போலவே, ஆங்காங்கே வெற்றுச் சம்பிரதாய உறுதி மொழியை எடுத்துக் கொண்டு உள்ளனர்.

ஆமாம், ஒவ்வொரு வருடமும் உறுதிமொழி எடுத்துக் கொள்கிறார்கள் என்றால் என்ன அர்த்தம்? உறுதிமொழி எடுத்துக் கொண்டவர்களே, தொடர்ந்து ஊழல் செய்துக் கொண்டிருக்கிறார்கள் என்றுதானே?!

இவர்கள் நாம் செய்யும் ஊழலை நாமே வெளிப் படுத்தும் முட்டாள்கள் என்பதை அறியாதவர்களா என்றால் இல்லை; அப்புறம் ஏன் செய்கிறார்கள் என்றால், மக்களை மடையர்கள் ஆக்குவதற்கே!

‘‘ஊழல்’’ என்பது, திருடுவதற்கு என்றே தீட்டப்பட்ட திட்டங்களில் இருந்து நமக்கு தெரியாமல் ஏதோ வொரு வகையில் பணத்தை திருடுவது.

இதற்கான உதாரணமாக, சாலை போடுவது, பாலங்கள் கட்டுவது என்பதை சொல்லலாம். இதில் ஒதுக்கப்பட்ட தொகையில், எவ்வளவு செய்யப்பட்டது, எவ்வளவு ஊழல் செய்யப்பட்டது என்பது அவர்களைத் தவிர மற்றவர்களுக்கு தெரியாது.

ஆனால், இலஞ்சம் என்பது, நம்முடைய வேலையை செய்துக் கொடுப்பதற்காக நம்மிடம் இருந்து பெறப்படுவது என்பதால், நமக்கு தெரிந்தது.

இந்த புரிதல் கூட இல்லாமல், இரண்டும் ஒன்றே என்று எண்ணு(பவர்களு)ம் ஊழல் எதிர்ப்பாளர்கள் பலர் இருக்கிறார்கள். ஆகையால்தான், இந்த விளக்கத்தைச் சொல்கிறேன்.

எனவே, ஊழலைச் செய்பவர்கள் நினைத்தால்தான் ஊழலை ஒழிக்க முடியும். ஆனால், நாம் நினைத்தால் லஞ்சத்தை ஒழிக்க முடியும். இலஞ்சம் ஒழிந்தால் ஊழல் தானாகவே ஒழிய ஆரம்பித்து விடும்.

ஆகவே, இரண்டையும் ஒழிக்க வேண்டிய கடமை, முற்றிலுமாக நமக்கே இருக்கிறது. எனவேதான், இலஞ்சத்தை ஒழிக்க தேவையான சில சட்டப் பூர்வமான வழிமுறைகளை, 2008 ஆம் ஆண்டில் எழுதிய ‘‘நீதியைத்தேடி... சட்ட அறிவுக்களஞ்சியம்’’ நூலில்..,

1. அரசூழியர்களை சட்டப்படி கடமையாற்ற வைப்பது எப்படி?

2. சட்டப்படி இலஞ்சம் கொடுப்பது எப்படி?

3. இலஞ்ச ஒழிப்பு அமைப்புக்கள் என்ன செய்கின்றன?

4. இலஞ்சத்தை, பண அஞ்சலில் பாதுகாப்பாக அனுப்பலாம்!

5. அரசு மருத்துவ மனையில் இலஞ்சம் கேட்டால்...?

6. அரசூழியரின் மனைவிக்கு கடிதம் அனுப்பலாம்!

7. துட்டு கொடுக்காமல் எட்டு போட்டு உரிமம் பெற...

8. போக்குவரத்து காவலூழியர்களுக்கு போக்கு காட்டுவது எப்படி?

என்ற தலைப்புகளின் கீழ் சொன்னேன்.

இதனைப் படித்த சில அரசூழியர்கள், ‘‘என்னங்க, இப்படி யெல்லாம் ஐடியா கொடுத்து இருக்கீங்க’’ என்று புலம்பி இருக்கிறார்கள். அப்படியானால், இதன் விளைவுகள் என்ன மாதிரி இருக்கும் என்பதை, படித்த உடனேயே அவர்களால் புரிந்துக் கொள்ள முடிந்து இருக்கிறதுதானே?!

இதெல்லாம் சட்டத்துக்கு உட்பட்டது என்பதால், அவர்களால் ஒன்றுமே செய்ய முடியாது. சட்டப்படி நிர்ணயிக்கப்பட்டு உள்ள கால அளவிற்குள் நம் வேலையை முடித்தே கொடுத்தாக வேண்டும்.

எனவே, சூழ்நிலைக்கு ஏற்றவாறு சொல்லியுள்ள இந்த வழி முறைகளை ஒவ்வொருவரும் கடைப் பிடித்தால், ஊழலை ஒழித்து விடலாம் என்பது, எனது ஆழ்ந்த அனுபவத்தின் வாயிலாக எழுந்த திடமான நம்பிக்கை.

ஆமாம், வழக்கம் போலவே, இதிலும் நான் கடைப் பிடித்த வழிமுறைகளையே உங்களுக்கு வழி மொழிந்து உள்ளேன்.

ஆமாம், சரியான சட்ட விழிப்பறிவுணர்வைப் பெற்று இருந்தால், எந்தவொரு சட்ட விரோதமான காரியத் தையும், இதிலும் குறிப்பாக அதிகாரத் திமிர் கொண்ட அரசூழியர்களின் சட்டத்துக்கு புறம்பான செயல்களை சட்டப்படியே சந்தித்து, தடுத்து நிறுத்துவதோடு, அவர்களையுங்கூட சந்தியில் நிறுத்த முடியும்.

அதிகாரத் திமிர்தானே இலஞ்சம் வாங்கவும், ஊழல் செய்யவும் தூண்டுகிறது. அதிகாரமே இல்லாமல் செய்து விட்டால், பல் பிடுங்கப்பட்ட பாம்புதானே?!

இப்படித்தான் இலஞ்சத்தையும் ஊழலையுங்கூட ஒழிக்க முடியுமே தவிர, ஊழலை ஒழிப்பதற்கு என்றே இருக்கிற ஊழல் அமைப்புக்களால் ஒருபோதும் ஒழிக்க முடியாது. இது அரசாங்க அமைப்புக்களாக இருந்தாலுஞ் சரி; தன்னார்வ அமைப்புக்களாக இருந்தாலுஞ் சரி.

ஆனால், நீதியைத்தேடி... உள்ளிட்ட நூல்களை வாங்கியவர்கள் கூட, அதனைப் படிக்காமலேயே புலம்பிக் கொண்டிருக்க, அவர்களை ஆழ்ந்து படித்து செயல்படுத்த வலியுறுத்தினேன். விளைவு?


இப்படி படித்தப்பின், அவ்வழிமுறைகளைப் பயன் படுத்தி பலர் பயன் அடைந்திருந்தாலுங்கூட, அது பற்றிய விவரங்களை ஏனோ சட்ட விழிப்பறிவுணர்வுப் பதிவாக பதிவிட முன்வரவில்லை.

ஆகையால், அதுபற்றி பலருக்கும் தெரியாமலேயே இருக்கிறது. எனவே, இலஞ்சத்தை ஒழிக்க வேண்டு மென நினைப்பவர்கள், நீதியைத்தேடி... உள்ளிட்ட நூல்களின் வாயிலாக தங்களுக்கு கிடைத்த அனுபவங்களை பதிவிட்டு பரப்புரை செய்யுங்கள்.

இப்படி செய்வதன் மூலம், சட்ட விழிப்பறிவுணர்வு இல்லாமல் இலஞ்சத்தை எதிர்க்கிறேன் என ஏடா கூடமான சட்ட சிக்கல்களில், அவர்கள் சிக்குவதை தவிர்க்கவும், தீவிரமாக எதிர்க்கவும் முடியும்!

பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Saturday, October 28, 2017

ஆண்களின் சந்நியாசமும், அதிலுள்ள சங்கட சாபக்கேடுகளும்!


மனைவி அமைவதெல்லாம் இறைவன் கொடுத்த வரம் என்றார்கள். 

உண்மைதான்! ஒரு குடும்பத் தலைவன், தன் குடும்பம், குழந்தைகளை விட்டு சந்நியாசம் செல்கிறான் என்றால், ‘‘அக்குடும்பத்தின் தலைவி அன்பானவளாக இல்லாமல் அரக்கியாக இருக்கிறாள்’’ என்றே அர்த்தம்.

மனைவியின் அரக்க குணம் ஆரம்பத்திலேயே தெரிந்து விட்டால், விவாகரத்தைப் பெற்று தப்பித்து விடுவார்கள். மாறாக, குழந்தைகளின் திருமண வயதில் தெரிந்தால், அவர்களின் பாடு அதோகதிதான்!

அவள் அரக்கியாக இருக்கிறாள் என்றால், அவளுக்கு, அவளது அப்பாவில் ஆரம்பித்து, உடன் பிறப்புக் களிடையே ஓடி, அவள் பெற்றெடுத்த பிள்ளைகள் வரை, பின் விளைவுகளை அறியாமல், அவளது அரக்கத் தனத்திற்கு பக்க பலமாய் இருக்கிறார்கள் என்று பொருள்.

ஆமாம், ‘‘காசிக்குப் போறேன் சந்நியாசி; உன் நிலைமை என்னாகும் நீ யோசி’’ என அவர் போய் விடுவார். இப்படிப் போனவர், நிச்சயமாக பிணமாக கூட திரும்பி வரமாட்டார். 


இந்தப் பாட்டை எல்லாம் இந்த அர்த்தத்தோடு தான் பாடிச் சென்று உள்ளனர், நம் முன்னோர்! இப்படி ஒவ்வொரு பாட்டுக்கும் உள்ளர்த்தம் இருப்பதை, ஆராய்ந்தால்தான் அறிய முடியும். 

ஆமாம், ‘‘காசிக்குப் போகும் சந்நியாசி; உன் குடும்பம் என்னாகும் நீ யோசி’’ என்பதை, ‘‘காசிக்குப் போறேன் சந்நியாசி; உன் நிலைமை என்னாகும் நீ யோசி’’ என வேறு விதமாக மாற்றி எழுதி இருக்கேனேன்னு நினைக்காதிங்க. 

இந்தப் பாட்டுல, சந்நியாசம் போக நினைத்தவரை தடுத்து, திருப்பி வீட்டிற்கு உள்ளேயே அனுப்பி விட்டார்கள். ஆனால், நானோ சந்நியாசம் போனால், குடும்பத்தில் உள்ள ஒவ்வொருவரின் நிலையும் என்னாகும் என்பதை, ஆராய்ந்து எடுத்து சொல்கிறேன். இதற்கேற்ப வசனத்தை மாற்றி அமைத்து இருக்கிறேன். அவ்வளவே! 

சரி, நம்ம போனவர் விசயத்துக்கு வருவோம். 

போனவர் உயிரோடு இருக்காரா... இல்லையா... 

நாம சுமங்கலியா இருக்கோமா... இல்லையா...

நாம பூ, பொட்டு வைத்துக் கொள்ளலாமா... கூடாதா...

சுப நிகழ்வுகளில் முன்னின்று கலந்துக் கொள்ளலாமா... கூடாதா...

சுப நிகழ்வுகளில் முன்னின்று கலந்துக் கொண்டால், நம் உற்றாரும், உறவினரும், உடன் பிறந்தவர்களும், பெற்றெடுத்த பிள்ளைகளும், மற்றவர்களும் நம்மைப் பற்றி என்னென்ன நினைக்கிறார்களோ என்றும்...

தன் உடன் பிறப்புகள், அனைவரையும் அழைத்துக் கொண்டாடும் 25 வது திருமண நாள், 60 வயது சஷ்டியப் பூர்த்தி, அதற்கு மேல் இருந்தால் 80 வயது சதாபிஷேகம் என அவரவரும் ஆனந்தமாக கொண்டாடும் ஒவ்வொரு தருனத்தின் போதும்.., 

நமக்கு இந்த வாய்ப்பு இருந்தும் இல்லாமல் போய் விட்டதே என, அக்கூட்டத்தில் கூனிக்குறுகி நிர்ப்பந்தத்தில் நிற்பதும்...

தன் மகனுக்கும், மகளுக்கும் தந்தையும் தாயுமாக கம்பீரமாக அமர்ந்து, திருமணம் செய்து வைக்க முடியாமல், உடன் பிறந்தவர்களை அல்லது முறையில்லாத நபர்களை முறையாக கருதி உட்கார வைத்து செய்து வைக்கும்போது..,

மிகவும் சந்தோசமாக இருக்க வேண்டிய, அத்தருனத்தில் நமக்கு இந்த வாய்ப்பு இருந்தும், நம் அரக்கப் புத்தியால் இல்லாமல் போய் விட்டதே என, அக்கூட்டத்தில் கூனிக்குறுகி நிர்ப்பதும்...

இதுபற்றி எல்லாம் தன் காதுபடவே பேசும் யாருக்கும் த(ர், க்)கப் பதில் சொல்ல முடியாமல், கேட்டும் கேட்காதது போல மனம் நோவதும் என...

அரக்கிகளாக திரிந்த அம்மனைவிகள் சாகும் வரை, மனப் போராட்டத்தில் ஒவ்வொரு நிமிடமும் செத்து செத்து வாழ்வதுதான் சன்னியாசம் பூண்ட கணவன் தரும் தண்டனை! 

இதுவுங்கூட வயது போய்விட்ட அல்லது மாற்றுத் துனை தேடமுடியாத பெண்களுக்கு மட்டுந்தான். வயதுள்ள பெண்களுக்கு வேறு யாராவது அகப்பட்டுக் கொள்வான்.

ஆமாம், ஊரறிந்த விபச்சாரிக்களுக்கே, பெரிய மனம் படைத்தவர்கள் வாழ்க்கை கொடுக்கிறார்களே!

குழந்தைகளைப் பொறுத்தவரை, சந்நியாசம் போக காரண அரக்கியாக இருந்த மனைவியை கேட்காமல், ‘‘உன் தந்தை எங்கே இருக்கிறார்’’ என அவரது குழந்தைகளைக் கேட்டால், உற்றார், உறவினர் என யார் கேட்டாலும், அக்குழந்தைகள் என்னத் தகுதியில் இருந்தாலும்..,

தங்களின் வீட்டில் நடந்த உண்மைகள் எதையும் வெளியில் சொல்ல முடியாமல், கூனிக்குறுதி தலையைக் கீழே தொங்கப் போடுவதையும், ஏதேதோ பொய்யைச் சொல்வதையும், அவர்களது வாழ்நாள் முழுவதும் கடைப்பிடிக்க வேண்டிய அவலம் இருக்கும். 

ஆமாம், போனவர் பிணமாக வீடு வந்து சேர்ந்து விட்டால் கூட இதெல்லாம் தீர்க்கமான முடிவாகி விடும். ஆனால் ஆளும் இல்லை; அவரது உடலும் வீட்டுக்கு வரவில்லை என்றால் நிலைமை என்ன என்பதை யோசித்துப் பாருங்கள். 

ஆம், வாழ்வை வெறுத்து, சந்நியாசம் போன ஆண்கள் யாரும், பிணமாக கூட வீடு (தி, வி)ரும்ப  மாட்டார்கள். இப்படி பலபேர் இ(றந்தி)ருக் கிறார்கள்.

குடும்பம் என்பது, கட்டிய மனைவி மட்டுமல்ல; பெற்ற குழந்தைகளும் சேர்ந்ததுதான். ஆகையால்,  காலப் போக்கில் அரக்கியாக விட்ட மனைவி களிடம் இருந்து தப்பிக்க, சந்நியாசம் போக நினைக்கும் ஆண்கள்.., 

இதனால், குழந்தைகளுக்கு ஏற்படும் சங்கடங்களை தவிர்ப்பதற்காக தனியாகப் பிரிந்து, அக்கம் பக்கத்தி லேயே வாழ முற்பட வேண்டுமே தவிர, கண் காணாத இடத்திற்கு சென்று, காலமானப் பின்னும் வராமலேயே போய் விடக்கூடாது.

இப்படிப் போய்விட்டால், இறைவனது வீடு பேற்றை பெருவீர்கள் என்பது ஆன்மீக நம்பிக்கை. இப்படித் தான், இறைவனது வீடுபேற்றைப் பெற வேண்டும் என்றால்,  வேறு வழியில்லை.

ஆனால், உங்களது வாழ்வைப் போலவே, உங்கள் குழந்தைகளின் குடும்ப வாழ்வும், பல்வேறு விதங்களில் கேள்விக்குறி ஆகிவிடும் ஆபத்துண்டு. 

இதையெல்லாம் ஏதோ ஆண்களுக்கு ஆதரவாகவும், பெண்களுக்கு எதிராகவும் சொல்வதாக யாராவது நினைத்தால், அவர்களுக்கும் அப்படியொரு நிலை வர வேண்டும் என நான் எண்ணமாட்டேன். 

இப்படியொரு நிலை யாருக்கும் வரக்கூடாது என்பதற் காகத்தான், இந்த ஆராய்ச்சி விழிப்பறிவுணர்வுக் கட்டுரையை எழுதி உள்ளேன். 

எனவே, இதிலுள்ள உண்மையை உணர இப்படி யொரு நிலை எனக்கு வர வேண்டும் என்றோ அல்லது இப்படியொரு நிலையை அனுபவிப்பவரை காணச் செய்ய அருள் புரிய வேண்டுமென்றோ வேண்டிக் கொள்ளுங்கள். இது நிச்சயம் நடக்கும். அப்போது உண்மையை உணரத்தானே வேண்டும். 

சரி, நான் சொல்வதை விடுங்கள். 

‘‘ஆவதும் பெண்ணாலே; மனிதன் அழிவதும் பெண்ணாலே’’ என்று யார்யாரோ எப்படி எப்படியோ எழுதி வைத்து விட்டார்கள். இதெல்லாம் ஆண்களே எழுதியது என்றால்..,

தன் பருவ அழகைக்கூட, வயோதிக வடிவமாக வேண்டிப் பெற்ற ஒளவைப் பாட்டிக்கூட, தான் விருந்துக்கு சென்ற வீட்டில், மனைவியாக இருந்த அரக்கியைப் பார்த்து விட்டு, இவளோடு வாழ்வதை விட என்னோடு சந்நியாசம் வந்து விடு என அழைத்துச் சென்று விட்டதாக செய்தி உண்டு. 

கள்ளம், கபடம், சூது, வாது இல்லாத அந்தக் காலத்திலேயே அவ்வைக் கிழவி, ஒரு குடும்பத் தலைவனை தன்னோடு சந்நியாசம் அழைத்துச் செல்லும் அளவிற்கு பொங்கி எழுந்திருக்கிறாள் என்றால்..,

தன் கள்ளக் காதலன்களோடு சேர்ந்து கணவனையே கொலை செய்யும், இந்தக்கால அரக்கிகளைக் கண்டு, அந்த அவ்வைக் கிழவி இப்போது இருந்தால், என்ன செய்வாளோ, சொல்லுவாளோ!

எனவே, பெண்களே தங்களுக்கு வாய்த்த கணவன் எப்படி இருந்தாலும், கல்லானாலும் கணவன்; புல்லானாலும் புருஷன் என வாழ்ந்து விட்டுப் போய்ச் சேர முயலுங்கள்.  

மாறாக, அறிவுப்பூர்வமாக முடிவு எடுப்பதாக நினைத்து, அரக்கத் தனமாக முடிவெடுக்காதீர்கள்! இப்படி அரக்கத்தனமாக முடிவு எடுக்கும், அரக்கி களுக்கு, நீங்கள் அவளது தந்தையோ, சகோதரனோ அல்லது மகனோ என யாராக இருந்தாலும் ஆதரவு தராதீர்கள். 

ஆதரவு தந்தால், நீங்களும் அதற்கான அனுபவத்தை அல்லது இதில் சொல்லியுள்ள ஒரு அனுபவத்தை யாவது  பெறுவீர்கள். இப்படி,  அவ்வளவே! 
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Friday, October 27, 2017

ஏலம் என்றாலே, எச்சரிக்கையாகி விட வேண்டும்!


இன்று மின்னஞ்சலில் வந்த மடலின் சுருக்கமிது! 

// நான் கோவை, கணபதி, சத்திரோட்டில் இயங்கி வரும் மகாமேரு பெனிபிட் பண்ட் நிறுவனத்தில் நகைக்கடன் பெற்றேன் ரூ:2,06,000/- கடன் கணக்கு எண்: D28/17.03.2016

நான் இதுநாள் வரை ரொக்கமாக ரூபாய் 31900/- செலுத்தியுள்ளேன் அத்தொகையில் ரூபாய்: 16982/- அசலில் வரவு வைத்துள்ளார்கள் அதற்கு இரசீதும் வழங்கியுள்ளார்கள். 

தற்பொழுது எனது நகையை ஏலத்தில் விட்டு நகைகடனை வரவு வைத்தது போக மீதி தொகையை செலுத்தும்படி எனக்கு நோட்டீஸ் அனுப்பி உள்ளார்கள். 

நான் எவ்வளவோ போராடியும் எனது நகையை ஏலத்தில் விட்டுவிட்டார்கள், காவல்துறையை நாடியும் எவ்வித பயனும் இல்லை எனவே எனக்கு தாங்கள்தான் உதவ வேண்டும்.// 

இவருக்கான எனது பதில்:

நீங்களே சட்டம் அறிந்து பிரச்சனையை தீர்த்துக் கொள்ள விரும்பினால், நீதியைத்தேடி... நூல்களை படிக்க வேண்டியிருக்கும்.

யாராவது தீர்த்து தரவேண்டுமென விரும்பினால், பிரச்சினையை பெரிதுபடுத்தி பணம் சம்பாதிப்பதற்கு என்றே உள்ள வக்கீல்கள் என்கிற பெ(ரு, று)ங்கூலிக்கு மாரடிக்கும் பொய்யர்களைத் தான் நாடனும்.

இதுபற்றிய மற்ற  விவரக் குறிப்புகள்:

வரும் முன் காக்கும் நடவடிக்கையாக, யாரும் சட்ட விழிப்பறிவுணர்வைப் பெற விரும்புவதில்லை. வந்தப் பின், எனக்கு உதவ வேண்டும் என்றால், ‘‘நானென்ன பெ(ரு, று)ங் கூலிக்கு மாரடிக்கும் பொய்த் தொழிலையா’’ செய்கிறேன்?!

இதுகூட தெரியாமல், நான் உதவ வேண்டும் என நினைப்பவர்கள் எவ்வளவு கூமுட்டைகளாக இருக்கிறார்கள் என்பதை விவரிக்க வேண்டிய தில்லை.

ஆனால், தங்களின் பிரச்சினையை தீர்ப்பது எப்படி என தெரியாமலேயே பலபேர், தங்களை எல்லாந் தெரிந்த லாடு லபக்கு தாசுகள் போன்று காட்டிக் கொண்டு இருக்கிறார்கள் என்பதையும்..,

ஆகையால்தான், நான் சட்ட ஆராய்ச்சியில் களமிறங்க வேண்டி இருந்தது என்பதையும் முதல் நீதியைத்தேடி... நூலிலேயே எழுதி, நான் உணர்ந்தது முற்றிலும் உண்மையே என்பதையும் நூல்கள் முழுவதும் நிறுவி உள்ளேன்.

இப்படித்தான் இம்மின்னஞ்சலை அனுப்பியவரும் இருக்கிறார் என தெரிகிறது. அதாவது இவர், ஒரு மாத இதழின் ஆசிரியராம்! 

மற்றொரு இதழில் துனை ஆசிரியராம்!! ஏதோவொரு நலச் சங்கத்தில் செயலராம்!!! பதிப்பகம் வேறு நடத்துவதாக, பெயருக்குப் பின்னால், ஒரு பெரிய பட்டியலே இருக்கிறது.

உண்மையை, ஒளிக்காமல் சொல்ல வேண்டுமானால், அறிவுள்ளவர்கள் எவரும் தன் அறிவைத்தான் நம்பு வார்களே தவிர, அவர்கள் இருக்கும் தகுதிகளை பட்டியல் போடவே மாட்டார்கள். அப்படிப் போட்டார்கள் என்றால், அவர்கள் முட்டாள்கள் என்றே அர்த்தம்.   

சரி, நம்ம தலைப்பு விசயத்துக்கு வருவோம்.

ஏலத்தில் விடுதல் என்பது மிகப் பெரிய மோசடி. ஆமாம், இதில் ஒரு பொருளுக்கான விலை மதிப்பு என்பதே கிடையாது. அவரவர்களும் விரும்பிய தொகைக்கு கேட்பதுதான் மதிப்பு. 

ஏல முறைகளை இரண்டாக பிரிக்கலாம். ஒன்று தன்னுடைய உடமையை தானே ஏலத்தில் விடுதல். அடுத்து, மற்றவன் பொருளை தன்னுடைய உரிமையை தவறாகப் பயன்படுத்தி ஏலத்தில் விடுதல். 

இவ்விரு முறைகளையும், இன்றைய இளைஞர்கள் பலர் பார்த்திருக்க வாய்ப்பில்லை. இரண்டாவது முறையை முதியவர்கள் கூட, பார்த்திருக்க முடியாது.


ஏனெனில், இதுபற்றி வெற்றுச் சடங்கு அறிவிப்புகள் எல்லாம், ஏலம் விட எத்தனிப் பவர்களின் அலுவலகங்களிலும், பொது மக்கள் படித்தும் படிக்காத நாளிதழ்களின் விளம்பரங்களில் மட்டுமே வரும். ஆகையால், இதுபற்றி சொல்வது சரியான புரிதலுக்கு ஏதுவாக இருக்கும். 

முதல் ஏல முறையில், அவர்களது பொருளை பொது இடத்தில் அல்லது மக்கள் அதிகமாக கூடும் சந்தைப் போன்ற இடங்களில், கூவிகூவி விற்பார்கள். 

அதன் ஆரம்ப விலை மற்றும் அதிகபட்ச விலை எவ்வளவு என்பதை அவர்களே தீர்மானிப்பார்கள். 

அதிக விலைக்கு யார் கேட்கிறார்களோ அவர்களுக்கு கொடுத்து விடுவர் அல்லது அவர்கள் எதிர்ப்பார்த்த லாபத்திற்கு யாரும் கேட்கவில்லை எனில் வைத்து விட்டு, அடுத்த பொருளை விற்க ஆரம்பிப்பர். இப்படி எந்தவொரு பொருளையுங் கூட விற்பார்கள். 

இதில், அவர்களுடைய ஆட்கள் சிலரும், பொதுமக்கள் போல கலந்து கொண்டு விலையை ஏற்றி விடுவார்கள். அவர்கள் இறுதியாக கேட்கும் விலைக்கு, வேறு யாரும் கேட்கவில்லை எனில், அவர்களே வாங்குவது போல வாங்கி வைத்துக் கொள்வதில் நட்டமில்லை. 

இந்த முறையிலான ஏலம், அவ்வளவாக புழக்கத்தில் இல்லை. ஆகையால், நான் பார்த்தே வருடக்கணக்கில் ஆகி விட்டது. 

இரண்டாவதாக, மற்றவன் பொருளை தன்னுடைய உரிமையை தவறாகப் பயன்படுத்தி ஏலத்தில் விடுதல் என்று ஆரம்பத்திலேயே சொன்னேன். அதாவது, அவர்களுக்கு செலுத்தாது நிலுவையில் உள்ள ஐந்து ரூபாய்க்காக.., 

‘‘ஐந்து ஆயிரமோ அல்லது ஐந்து லட்சமோ கூட மதிப்புள்ள பொருளை, 50 பைசாவுக்குத்தான் ஏலம் போனது’’ என அவர் களுடைய பினாமிகளுக்கே விற்று விட்டு, நிலுவை ரூபாய் 4.50 ஐ செலுத்தச் சொல்லுவார்கள். 

இப்படித்தான் இவரது நகையை குறைந்த விலைக்கு விற்றதாகே கணக்கு காட்டி, மீதி தொகையை கட்டச் சொல்லி இருக்கிறார்கள் போலும். ஆமாம், ஆனால் இதுகுறித்த விவரங்களை சொல்லாததால், இப்படித் தான் இருக்க வேண்டும் என்பது அனுமானம். 

இடத்தின் பேரில் கடன் வாங்கி இருந்தால், இடத்தை கைப்பற்றி விடுவார்கள். சம்பந்தமே இல்லாமல் பல இடங்களில், இது எங்களுடைய சொத்து; அத்துமீறி நுழைவோர் தண்டிக்கப்படுவீர்கள் என வங்கிகள் அறிவிப்பு பலகைகளை வைத்திருப்பதை கண்டு இருப்பீர்கள். 

இதனை கிராமத்தை விட, அதிக விலை மதிப்புள்ள நகரப் பகுதிகளில் அதிகமாகவே காணலாம். இது எல்லாமே இப்படி கைப்பற்றப் பட்டதாகத் ன் இருக்கும். இதற்கு முன்பாக, இதுதொடர்பான சம்பிரதாய வழக்குக்களும் நடந்து இருக்கும். 

நிதிபதிகளால் ஜப்தி செய்யப்பட்டு, ஏலம் விடப்படும் ஏலங்களே இப்படித்தான், மிகவும் நா(ண, ன)யமாக இருக்கும். எனவே, ஏலம் என்றாலே எச்சரிக்கையாகி விட வேண்டும். 

ஆமாம், எப்படியாவது நம் பொருளை மீட்டு விட முயல வேண்டும். இல்லை எனில்,  அவ்வளவுதான்!  அவர்கள் சொல்வதுதான்!! 
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Sunday, October 22, 2017

உண்மையே பாதுகாப்பு!


சிவகங்கை மாவட்டத்தைச் சேர்ந்த நம் வாசகர், நெடுஞ்சாலைகளில் அவ்வப்போது பாதுகாப்புக்கென காவலூழியத்தில் ஈடுபடும் காவலூழியர்கள், ‘‘சும்மாதானே நிற்கிறார்கள்’’ என அவர்களிடம் நம் நூல்களைக் கொடுத்து படிக்க சொல்வாராம்!
அடடே... காவலூழியர்களை சட்டம் படிக்க வைக்க இந்த யோசனை கூட, ரொம்ப நல்லாயிருக்கு.

ஆனால், அவர்கள் என்னதான் சட்டம் படித்தாலும், அரசின் கூலிக்கும், மற்றவர்களின் கைகூலிக்கும் மாரடிக்கும் அடிமைகள். ஆகையால், அவர்களால் சட்டப்படி எதையுமே செய்ய முடியாது.

சரி, நம்ம விட்ட விசயத்துக்கு வருகிறேன்.

அதனைப் படிக்கும் உயர்மட்ட முதல் கீழ்மட்ட காவலூழியர்கள் வரை, இவ்வளவு சங்கதிகள் இருக்கா சட்டத்தில் என ஆச்சரியப் படுவார்களாம்.

சிலர் அவர்களது சட்டப் பிரச்சினைகளுக்கு ஆலோசனை கேட்பார்களாம். இவருக்கு தெரிந்ததை சொல்லுவாராம். இவருக்கே சரியாக எதுவும் தெரியாது என்பதே, எனக்கு தெரிந்த உண்மை.

கடந்த முறை காரைக்குடியில் இருந்து காவல் ஊழியத்துக்கு வந்த ஒரு தலைமைக் காவலரிடம் வழக்கம் போலவே படிக்க கொடுத்தபோது, இதுவரை எந்த காவலூழியரும் சொல்லாத சங்கதி ஒன்றை சொன்னாராம். அதனாலேயே, நமக்கு இந்த சங்கதியை சொல்கிறாராம்.

அதாவது, ‘‘சட்ட அதிகார வர்க்கத்தை எதிர்த்து, சட்டத்தில் உள்ள உண்மைகளை எல்லாம் தெளிவுபட இவ்வளவு வெளிப்படையாக எழுதும் அவரை நாம் எப்படியாவது பாதுகாக்க வேண்டுமே!’’ என்றுகூறி மற்ற விபரங்களை எல்லாம் கேட்க, இவரும் தெரிந்த வரை சொன்னாராம்.

இறுதியாக ‘‘அவருக்கு உண்மை ஒன்றே பாதுகாப்பு. இதைப்பற்றி அவர் பத்திரிகையிலும், நூல்களிலும் எழுதி இருக்கிறார்’’ என்று இவர் சொன்னாராம்.

ஆமாம், இவர் சொல்வதுபோல உண்மையே பாதுகாப்பு என்ற தலைப்பில், ‘‘கடமையைச் செய்! பலன் கிடைக்கும்’’ முதல் இதழிலேயே எழுதினேன்.

ஓ, அப்படியா என ஆச்சரியப்பட்டு, இந்தக் காலத்திலும் இப்படியெல்லாம் மனிதர்கள் இருக்கிறார்களா என்பதை நம்பவே முடியவில்லை என்றாராம்.

தினந்தினம் ரவுடிகளையும், பொறுக்கிகளையும் கொள்ளையர்களையுமே கையாள்கிற இவர்களுக்கு, என்னைப் போல உள்ளவர்களை நம்ப முடியாதுதான். என்ன செய்வது?!

எப்படியாவது ஒருமுறை என்னிடம் பேச வேண்டும் என்றதற்கு, நாங்களே பேசமுடிவதில்லை என்றாராம், இவர்.

இருந்தாலும், இதுபற்றிய தகவலோடு உங்களின் உலாப்பேசி எண்ணையும் கொடுக்கிறேன். அவர் நினைத்தால், உங்களை கூப்பிட்டு பேசுவார் என்று கூறிவிட்டு, அதன்படியே எனக்கும் அனுப்பி வைத்து இருக்கிறார்.



உண்மை ஒன்றுதான் தக்க பாதுகாப்பு. உண்மை காக்காத ஒன்றை வேறு யாராலும் காக்க முடியாது.

வீரத்துறவி விவேகானந்தர் கூட, ‘‘பொய்யைச் சொல்லி தப்பிக்க நினைக்காதே; உண்மையைச் சொல்லி மாட்டிக் கொள். ஏனெனில், பொய் உன்னை வாழ விடாது. உண்மை சாகவிடாது’’ என்று சொன்னதாக சொல்கிறார்கள். இப்படி பலரும் பலவாறாக சொல்லி இருக்கிறார்கள்.

காவலூழியர்கள்தான் நம்மை காக்க முடியும் என்றால், உண்மையே உண்மையில்லை என்றாகி விடும் என்ற உண்மை புரியாமல் தான், அத்தலைமை காவலூழியர், என்னைப் பாதுகாக்க வேண்டுமென சொல்லி உள்ளார் என்பதை அவருக்கே எடுத்துச் சொல்லத் தான் வேண்டி உள்ளது.

ஆனால், நம் வாசகர் சொன்னபடி, நாட்டுக்கு நல்லது செய்பவர்களை பாதுகாக்க வேண்டும் என சொன்ன உணர்வு வந்ததே அதிசயந்தான். ஆகையால், வரவேற்கத் தக்கதே!

உண்மை யில்லாமல் அதிகாரத்தை தங்களுக்காக தவறாகப் பயன்படுத்தி காவலூழியர்களின் பாதுகாப்பில் இருப்பவர்கள் எல்லாம், ஏதோவொரு விதத்தில் கைதிகளே! பேருதான் பாதுகாப்பு!!

தன்னார்வலர்கள் என்றப் பெயரில் திரியும் பல தறுதலைகளே இப்படிப்பட்ட பாதுகாப்பில் தான் திரிந்துக் கொண்டிருக்கிறார்கள். இவர்களுக்கு இதை விட கேவலம் வேறெதுவுமில்லை.

ஆமாம், இவர்களுக்கு வழங்கப்பட்டும் சட்ட விரோத பாதுகாவலின் மூலமே, அவரவர்களது சட்ட விரோத செயல்களை அரசு சேகரிக்கிறது என்பது கூட புரியாத கூமுட்டைகள்.

ஆகையால், காவலூழியர்களின் பாதுகாப்பில் உள்ளவர்கள் எவரும், ஒருபோதும் என்னைப்போல் சுதந்திரமாக இருந்திட முடியாது.
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Saturday, October 21, 2017

நமக்கான வீட்டை, நாமே திட்டமிட்டு கட்டலாம்!


‘‘வீட்டை கட்டிப் பார்; கல்யாணத்தை செய்துப் பார்!’’ என்றார்கள் நம்ம முன்னோர்கள்.

இதற்கு பொதுவாக, ‘‘இவ்விரண்டையும் சுலபமாக செய்ய முடியாத அளவிற்கு பணம் செலவாகும்’’ என்றே பொருள் கொள்கின்றனர். 

ஓர் ஆராய்ச்சியாளர் என்ற வகையில் இது தவறு என்றும், இதனை வேறு விதமாகவுமே பார்க்க வேண்டு மென்றும் தோன்றுகிறது. 

ஆமாம், வீட்டை கட்டிப்பார் என்பது பொது. ஆனால், கல்யாணத்தைப் பண்ணிப் பார் என்பதில், யாருக்கு என்ற கேள்வி இருக்கிறது. இந்தக் கேள்விக்கு அனைவரும், தன்னுடைய மகன் அல்லது மகளுக்கே என்றே எண்ணத் தோன்றும். ஆனால், எனக்கு எண்ணத் தோன்றுவதோ, அவரவர்களுக்கே!

சரி, சங்கதிக்கு வருகிறேன். 

வீடு கட்டுவதில் மற்றவர்களை விட, தன்னால் 20% செலவை குறைக்க முடியும்; குறைந்தது 10% ஆவது குறையும் என்கிறார், அன்பர் ஒருவர். 

இதில், 10% தொகையை அவருக்கு தந்துவிட வேண்டும். நமக்கு 10% மிச்சம் என்கிற ஒப்பந்த அடிப்படையில் இதனை சேவையாக செய்கிறார். அதாவது, வீடு இல்லாத ஏழை எளிய மக்களுக்கு மாத்திரமே இதனை செய்கிறார். கட்டுமான நிறுவனங்களுக்கு இதனை செய்யவில்லை. 

அவரது கட்டுமானங்கள் எப்படி இருக்கிறது என்று ஆராய்ந்துப் பார்த்தேன். வித்தியாசமாகத்தான் இருந்தது. கட்டுமான துறையில் களமிறங்க வேண்டு மென்ற எண்ணத்துடன் உள்ள அன்பரையும் அழைத்துச் சென்றேன். அவரும் ஆச்சரியப்பட்டார். 

அதாவது வடிவமைப்புக்கு பெரிய அளவில் செலவு செய்து, வித்தியாசமாக கட்டப்பட்டுள்ள கட்டிடங்கள் பலவற்றைப் பார்க்கலாம். ஆனால், மிகக் குறைந்த வடிவமைப்பு செலவில் கட்டிட வித்தியாசத்தை இவரிடம் பார்க்கலாம்.



ஆமாம், தான் நடத்தும் யோகா சென்டரை முக்கோண வடிவில் கட்டியுள்ளார். இவர் ஒருமுனையில் உள்ள மேடையில் அமர்ந்து யோகா உட்பட எதனை சொல்லிக் கொடுத்தாலும், அச்சு அசலாக அத்தனை பேருக்கும் தெளிவாக தெரியும். 

ஆகையால், கவனம் சிதறாது. இதில் தென்னங் கூரையை வேய்ந்து, அது காற்றில் தூக்காமல் சேதமாகாமல் இருக்க, மீன் வலையை மேலே போட்டு கட்டி விட்டார்.



மற்றொரு இடத்தில் ஃ வடிவில் மூன்று சிறுசிறு அறைகளை அமைத்து, இவ்வறைகளை ஒட்டி ஒரு திண்ணையையும் நடுவில் ஓரு சதுர வடிவ திண்ணையையும் அமைத்துள்ளார்.

ஆகையால், ஒவ்வொருவரும் அவரவர் வீட்டு வாசலில் இருந்தபடியே மற்ற இரு வீட்டாரிடமும் உரையாட முடியும். உண்மையில், இது அறுகோணம் அமைப்பு. 

ஆனால், ஒன்றுக்கொன்று இடைவெளி இருப்பதால், முக்கோணம் போல் தெரியும். முக்கோணத்தின் சிறப்பு இயல்புகளைப்பற்றி, நானுங்கூட ‘‘மநு வரையுங்கலை!’’ நூலில் எழுதி உள்ளேன்.

இப்படியொரு வீட்டை அமைத்து, ஒன்றைப் படிக்கவும், அலுவலகமாகவும், இரண்டாவதை சமையல் மற்றும் சாப்பாட்டுக்காகவும், மூன்றாவதை உறங்கவும் பயன் படுத்தலாம். இம்மூன்றிலும் ஒருங்கினைந்த கழிவறை மற்றும் குளியல் அறையை அமைத்து உள்ளார். 

கூட்டுக் குடும்பத்தில் உள்ளோர், ஆளுக்கொன்றில் இருந்தால் தனியாகவும், கூட்டாகவும் இருப்பது போல் உணர்வு இருக்கும். இதனால், கூட்டுக்குடும்பத்தில் இருக்கும் பாதி பிரச்சினைகளும் குறையும். 



மிக முக்கியமாக இவருக்கென கட்டியுள்ள வீட்டின் மாடியில், கூலிங் டெயில்ஸைப் பதித்து உள்ளார். ஆகையால், வீடு எப்பொழுதும் குளிர்ச்சியாகவே இருக்கிறது. 

மேலும், வீட்டில் மேலிருந்துதான் வெப்பமும், குளிரும் வீட்டிற்குள் இறங்கும் என்பதில்லை.

நான்கு பக்க வாட்டு சுவர்களில் இருந்தும் வெப்பம் இறங்கும் என்று கூறி, நான்கு பக்கமும் சுமார் ஆறடிக்கு தாழ்வாரத்தை அமைத்து, அதனைச் சுற்றி கம்பி வேலியையும் அமைத்து விட்டதால், வீட்டுக்குள் வெயில், குளிர் மட்டுமல்ல; வெளி நபர்களும், விலங்குகளுங்கூட எளிதில் செல்ல முடியாது.

மேலும், நான்குபக்க தாழ்வாரத்தில் நடை பயிற்சி மேற்கொள்ளவோ, சந்திக்க வரும் முக்கியமல்லாத நபர்களை வீட்டிற்குள் அழைத்துச் செல்லாமல் இந்த இடத்தில் அமர வைத்து பேசி அனுப்பி விடலாம்.

சுப தினங்களில் இந்த இடத்தை பெரிய அளவில் சமைப்பதற்காகவும் பயன்படுத்திக் கொள்ளலாம். இப்படி, வேறு பயனுள்ள வகையில் பயன்படுத்திக் கொள்ளவோ முடிகிறது. 

வீட்டிற்கு மேலே செல்ல நிரந்தரமான கட்டுமானத்தை செய்யாமல், இரும்பினால் ஆன படிக்கட்டுகளை அமைத்து உள்ளது, இடத்தை மிச்சப்படுத்தி உள்ளதோடு, அதனை தேவைக்கு ஏற்ப எந்த பக்கமும் எளிதில் மாற்றி வைத்துக் கொள்ள முடியும். மேலும், இதற்கான செலவும் மிகக்குறைவு. 

இதற்கு முன்பாக, நம் பாரம்பரிய முறைப்படி மண்ணால் கட்டி வாழ்ந்த கட்டிடங்கள் கடந்த சில ஆண்டுகளில் பெய்த பெருமழை மற்றும் காற்றில் விழுந்து விடவே, இப்போது இப்படி கட்டியுள்ளார். 

வீட்டை பராமரிக்க பணத்தையும், நேரத்தையும் செலவிட தயங்காதவர்கள், நம் பாரம்பரிய முறைப்படி மண் வீட்டையே கட்டிக் கொள்ளலாம். இதற்கான ஆட்கள் இன்றும் இருக்கிறார்கள்.

இதன் மேலே நமக்கு தக்க பனை அல்லது தென்னை உள்ளிட்ட ஓலைகளில் கூரையை வேய்ந்து, வெப்பத்தின் தாக்குதலில் இருந்தும் தப்பித்துக் கொள்ளலாம்.

வீடு கட்டுவதற்கான இடம், அதனை கட்ட வேண்டிய முறையான மனையடி சாஸ்திரம் ஆகியவற்றின்படி, நாம் வீட்டை கட்ட முயலாமல் அல்லது இதுபற்றி தெரியாத வேலைக்காரர்களிடம் கட்டிட வேலையை ஒப்படைத்தால், அவ்வீடு எந்த விதத்திலும் பூர்த்தி யாகாது என்பது எனக்கு நன்றாகவே தெரியும்.

எனவே, இவரின் கட்டுமானங்கள் எல்லாம், அவரவரது தொழிலைப் பொருத்தும், வாஸ்து அடிப்படையிலுமே இருக்கும் என்பதால், நீங்கள் எம்மதத்தவர் ஆயினும், இதில் சம்மதம் உள்ளவர்கள் மட்டும், இவரிடம் இலவச ஆலோசனையைப் பெற்று வீடுகட்டிக் கொள்ளலாம். அதாவது இயற்கை தந்த அறிவுக்கு கட்டணமில்லை என்பது கொள்கை. 

ஆனால், வீட்டின் வரைபடம் உள்ளிட்ட உடல் உழைப்புக்கு மிக குறைந்த கட்டணத்தை அதாவது, வெளியில் ரூ 100 என்றால் இவர் ரூ 25 வாங்குவார். 

வரைபடத்தை குறுந்தகட்டில் காட்சிப்படுத்தி தந்து விடுவார். இதிலுள்ள குறைகளைப் போக்கிக் கொள்ள மூன்று வாய்ப்புகளும் உங்களுக்கு உண்டு. சாதாரண முறையில் கட்ட நினைக்கும் உங்களுக்கு இதெல்லாங் கூட  தேவைப்படாது. 

நம் வழக்கில் நாமே வாதாடுவதைப் போல, நம் உடல்நலக் குறைவை நாமே போக்கிக் கொள்வதைப் போல, நமக்கு தேவையான வீடு எப்படி இருக்க வேண்டுமென தெரிந்து வைத்திருந்தால்தான், நாம் நினைத்தபடியே  வீட்டைப் பெறமுடியும். 

ஆமாம், நம் உயிரையும் சட்ட உரிமைகளையும் முறையே கூலிக்கு  மாரடிக்கும் மருத்துவர்களிடமும், பொய்யர்களிடமும் பணயம் வைத்து விட்டு, நமக்கு திரும்ப கிடைக்குமா என காத்திருப்பதைப் போல, கட்டிடப் பொறியாளர்கள் என்கிற பொறுக்கிகளிடம் வீடு கட்ட ஒப்பந்தம் போட்டு விட்டு, காத்துக் கிடப்பவர்கள் ஏராளம். 

இதில் ஏற்படும் சண்டை சச்சரவில், நிதிபதிகளிடம் வழக்கை கொடுத்து, ஏன்டா வழக்குக்கு வந்தோம் என நொந்து கொண்டிருப்பவர்களும் இலட்சக் கணக்கில் உண்டு. 

ஆமாம், இதற்கு நல்லதொரு உண்மையைச் சொல்ல வேண்டுமென்றால், மதுரையில் உள்ள போத்தீஸ் துணிக் கடைக்கு பின் பக்கத்தில் உள்ள பிரகாஷ் பிரிண்டர்ஸில்தான், நம் நூல்களை அச்சிடுகிறோம்.

இவர் தனது வீட்டின் மீது மேலும் இரண்டு மாடிகளை கட்ட திட்டம் போட்டு, கட்டடப் பொறியாளரிடம் ஒப்பந்தம் போட்டு, பல லட்சங்களை கொடுத்தும் விட்டார்.

ஆனால், ஒப்பந்தக் காரரோ இவரின் சம்மதம் இல்லாம லேயே, இவரது முழு இடத்தையும் உங்களுக்கு வாங்கி தருவதாக போஸ்தீஸ் துணிக் கடை  உரிமையாளரிடம் சொல்லி விட்டார். யார் இடத்தை யாருக்கு விற்பது என யார் தீர்மானிப்பது?

அத்துணிக்கடையில் வேலை பார்ப்பவர்களின் வாகனங்களை நிறுத்துவதற்காக இந்த இடம், அவர்களுக்கு வசதியாக இருக்கும் என்பதால் தேவைப்பட்டது.

இதற்காக, ஒப்பந்தப்படி வேலையை செய்து தராமல், அவர்களுக்கு விற்று விடும்படி நிர்பந்தப்பட்டுத்த, இது தொடர்பாக இரு தரப்பாரும் கொடுத்த இரண்டு குற்றவியல் மற்றும் நுகர்வோர் வழக்குக்கள் என மூன்று வழக்கக்கள் நிலுவையில் இருந்து வருகிறது.

நான் தொடர்பில் இல்லாது, வட மாநிலத்தில் வசித்த காரணத்தினால், நம் சட்ட விழிப்பறி உணர்வுக்கு பல்வேறு வழிவகைகளில் உதவியாக இருந்த இவருக்கு நான் எந்தவித சட்ட வழி காட்டுதலையும் செய்ய முடியாமல் போய் விட்டது என்பதையும் வருத்தத்துடன் பதிவு செய்கிறேன். 

இதனால், இவர் தனது அச்சகத்தையே தன் சொந்த இடத்தில் நடத்த முடியாமல், வேறு வாடகை இடத்திற்கு மாற்றும் சூழ்நிலை உருவாகி மாற்றி விட்டார். இதனாலும் நட்டமே!

நம் வழக்கில் வாதாடும் பொய்யர்கள் நம் எதிர்த் தரப்பிடம் விலைபோய் விடுவார்கள். அதுபோலவே, இப்போது கட்டிட ஒப்பந்தக்காரர்களும் ஆகி விட்டார்கள்.

எனவே, இப்போதுள்ள சூழ்நிலையில் நாம் சொல்லும் வேலையைச் செய்ய ஆட்களை தேர்ந்தெடுத்து, அவர்களை வைத்து வீடு கட்டிக் கொள்வதே புத்திசாலி த்தனம் ஆகும். 

நம் தேவையை நாமே பூர்த்தி செய்துக் கொள்ள வேண்டும், தற்சார்பு வாழ்க்கையை வாழ வேண்டு மென்ற அடிப்படையில் வீடு உள்ளிட்ட கட்டிடங்களை கட்ட விரும்பும் நபர்கள் மட்டும், திரு.பிரபு panchakosha@gmail.com என்ற மின்னஞ்சலில் தொடர்பு கொள்ளவும்.
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Friday, October 20, 2017

நாமே சர்க்கரையை தயாரிக்கலாம்!


வெள்ளை சீனியில் பல்வேறு வேதியியல் பொருட்களை சேர்க்கிறார்கள்; ஆகையால், உடலுக்கு கெட்டது. அதனை சாப்பிடுவதை கை விடுங்கள். இதற்கு பதிலாக நாட்டுச் சக்கரைக்கு மாறுங்கள் என பலரும் பரப்புரை செய்கிறார்கள். 

நாட்டுச் சக்கரையும், வெல்லமும் எல்லா உணவுப் பொருட்களுக்கு ஏற்றதாக இல்லை. இதனை பரப்புரை செய்வோரும் நன்கறிவர்.  

எனவே, எவ்வளவுதான் உடலுக்கு கேடு என்றாலும், கடையில் கிடைக்கும் அல்லது ரேஷன் கடையில் மலிவு விலையில் அல்லது விழாக்காலங்களில் இலவசமாக வழங்கப்படும் வெள்ளைச் சீனியைத் தான் பயன்படுத்த வேண்டி இருக்கிறது.

நோயை விலை கொடுத்து வாங்குபவர்கள், இலவசமாக கிடைக்கும் சீனியை, அவ்வளவு எளிதில் விட்டு விடுவார்களா என்ன? 

இதற்கு மாற்றாக, கல்கண்டு பொடி என்றப் பெயரில் பதஞ்சலில் விற்பதை (BURA SUGAR) பயன்படுத்தலாம் என்றால், அதிலும் ஏதேதோ குறை சொல்கிறார்கள். 

ஆனால், வெள்ளை சீனிக்கு இது எவ்வளவோ பரவாயில்லை என்பது என் நிலைப்பாடு. ஆகைவே, நான் சொல்லும் முறையில் சுயமாக தயாரிக்க முடியாதவர்கள் இதனை உபயோக்கிக்கலாம்.   

இப்படி, சந்தையில் விற்கப்படும் பொருட்களைப் பற்றி குறை சொல்பவர்கள் யாரும், அதற்கு தக்கதொரு சரியான மாற்றுத் தீர்வு என்ன என்பதை ஏனோ சொல்வதில்லை.

உண்மையில், மாற்றத்தீர்வை சொல்ல முடிந்தவர் களுக்குத்தான், குறை சொல்லும் உரிமையுண்டு என்பது என் திடமான கருத்து. 

இப்படிப்பட்ட நிலையில், மாற்று என சிந்தித்த போது சில வருடங்களுக்கு முன்பு 2013 - 2014 இல் சுயமாக சக்கரை தயாரித்ததையே பின்பற்றலாம், இந்த எளிய முறையைப்பற்றி உங்களுக்கும் எடுத்துச் சொல்லலாம் என நினைக்கிறேன்.

அதாவது, ஜெயலலிதா பிறந்த ஊரான மேல் கொட்டையில், ‘‘கடமையைச் செய்! பலன் கிடைக்கும்’’  நூலை எழுதிக் கொண்டிருந்த காலமது. 

கூடவே, இயற்கை விவசாயம் செய்துக் கொண்டிருந்த அன்பர்களுக்கு என்னால் இயன்ற உதவியை செய்துக் கொண்டிருந்தேன். 


அங்கு, விளைவித்த கரும்பை கொண்டு வந்து, கரும்பு ஜீஸ் பிஜிபவரிடம் கொடுத்து பிழிந்து சாறு எடுத்து, அடுப்பில் வைத்து காய்ச்ச காய்ச்ச இளம் பச்சை நிறத்தில் கிடைத்த சக்கரையை பயன்படுத்திக் கொண்டேன். இது, ஏனோ மற்றதை விட அதிக இனிப்புச் சுவை உடையதாகவே இருந்தது. 

இப்படி, எது ஒன்றையும் நமக்கு நாமே கலப்படம் ஏதுமின்றி தயாரித்தும், பயம் சிறிதும் இன்றியும் பயன்படுத்தும் போது, அதிலுள்ள உணர்வும், சுவையும் தனிதான்!

இதனை எவ்வளவு விலை கொடுத்தாலும் பெற முடியாதது என்பதும் உறுதி!!

எனவே, தோட்டமும் போதிய இடமும் இருப்பவர்கள், இதனை சிறந்த தொழிலாகவே செய்து, தாங்களின் பணப்பலனை அடைவதோடு, தங்களைச் சார்ந்துள்ள மக்களின் ஆரோக்கியத்திற்கும் உதவலாம். 

ஆனால், இதுபற்றியெல்லாம் சிந்திக்காத விவசாயிகள் கரும்புக்கு போதியவிலை கிடைக்க வில்லை என அரசாங்கத்திடம் நெடுங்காலமாக வீணாகப் போராடிக் கொண்டு இருக்கிறார்கள்.

விவசாயிகள் என்றப் பெயரில் பச்சை துண்டுடன் போராடுபவர்கள் எவரையும், விவசாயிகளாக பார்க்க முடியவில்லை. மாறாக, விவசாயிகள் என்றப் பெயரில் கொழுத்த அரசியல் வியாதிகளாகத்தான் பார்க்க முடிகிறது என்பது, என்னுடைய கருத்து மட்டுமல்ல;  பலரும் என்னிடம் பகிர்ந்துள்ள கருத்து 

ஆமாம், உண்மையான விவசாயிகளுக்கு வயிறு என்ற ஒன்றே இருக்குமிடம் தெரியாது. ஆனால், தலைநகர் தில்லியில் அம்மனப் போராட்டம் நடத்தும் விவசாயி களின் வயிற்றைப் பார்த்தால், பாலுக்கென்றே வளர்க்கப்படும் ஜெர்சி மாட்டின் பால் மடியை விட பெரிதாக தொங்குகிறது. 

சோத்துக்கு இல்லை என்று சொல்லி போராடுபவர் களால், எப்படி இவ்வளவு நாட்கள் தலை நகர் தில்லியில் தங்கி இருந்து போராட முடியும்? என்பதை எல்லாம் யோசிக்காமல் இருக்க முடியவில்லை.

ஆனால், அவர்களைத் தவிர மற்ற விவசாயிகள் எல்லாம் அவரவர்களது விவசாயத்தில் கண்ணுங் கருத்துமாகவே இருக்கின்றனர். 

விவசாயிகள் இல்லை என்றால், யாருக்கும் உணவில்லை என்பது எல்லோருக்கும் தெரியும். 

இப்படிப்பட்ட தாங்களை எவரும் தேடி வரும் சூழ்நிலையை கட்டமைக்காமல், அரசு கட்டமைத்து உள்ள நிலைகளுக்குள் சென்று விவசாயிகள் வீணாகச்  போராடிக் கொண்டு இருக்கிறார்கள். 

சரி, நம்ம விசயத்துக்கு வருவோம். 

தோட்டமும், இடவசதியும் இல்லாதவர்கள் கரும்பு சாகுபடி செய்பவர்களிடம் கரும்பை வாங்கி, அவ்வப்போது தயாரித்துக் கொள்ளலாம் அல்லது மொத்தமாகவே கூட தயாரித்து வைத்துக் கொள்ளலாம்.

கரும்புக்கு அதிக விலை கேட்பவர்கள், இந்த திட்டத்தை தங்களது ஊரில் அறிமுகப்படுத்தினால், நிச்சயமாக திருப்தி அடையலாம். 

இல்லையேல், வேலையே கிடைக்கவில்லை என்று சில ஆயிர ரூபாய் வேலைக்காக அலைந்து திரிந்துக் கொண்டிருக்கும் இளைஞர்கள் இதனைச் செய்தால், நல்ல தொழிலாகி விடும். வெள்ளைச் சக்கரை முற்றிலும் ஒழிக்கப்படும் சூழ்நிலை தானாகவே உருவாகி விடும். 

இப்படி, கரும்பு பயிரிடும் ஒவ்வொரு விவசாயியும் தங்களின் ஊர் தேவைக்கு ஏற்ப மட்டும் பயிரிட ஆரம்பித்தால், நீங்கள் கேட்பதை விட அரசு அதிக விலை கொடுத்து கேட்கும் சூழ்நிலையும் தானாகவே உருவாகி விடும். 

கடுமையாக உழைக்கும் விவசாயிகள் , அதற்கான பணப் பலனை அவர்களும் அடையாமல், மக்களுக்கும் தரமான பொருட்களை கொடுக்காமல், பெரிய அளவில் கொள்முதல் செய்யும் பண முதலைகளிடம் குறைந்த விலைக்கு கொடுக்க.., 

பின் இதனை பெரிய பண முதலைகள், சிறிய பண முதலைகளிடம் சிறிய லாபத்துக்கு விற்க என மீண்டும் அந்த விளை பொருட்கள், விளைந்த அந்த ஊருக்கே நான்கு நாட்கள் கழித்தும், நாலு பேர் கை மாறியும். நாலு மடங்கு விலை அதிகமாகியும், வதங்கியும், அழுகியும் விற்பனைக்கு வருகிறது. 

இதனால், ஏற்படும் நட்டத்தை தடுக்க தற்காலிக விலை ஏற்றம், நிரந்தரமாக தடுக்க மரபணுவை சேர்த்தல் என பல்வேறு வில்லங்கங்கள் உண்டாகின்றன. இப்படி பல்வேறு விளைவுகளை சொல்லிக் கொண்டே போகலாம் என்றாலும், புரிந்துக் கொள்ள இதுவே போதும். 

இதனை எல்லாம் முறியடிக்க சில விவசாயிகளிடம் நான் பேசியது எதுவும் பலன் அளிக்கவில்லை. என்ன செய்வது?!

சரி, நம்ம விசயத்துக்கு வருவோம். 

கருப்புக் கரும்பை விட, வெள்ளைக் கரும்பில் சர்க்கரை அதிகமாக கிடைக்கும் என்பதால், இதனையே தேர்ந்தெடுத்துக் கொள்ளலாம். இதுகூட, வேறெதுவும் சேர்க்க தேவையில்லை. நான் இப்படித்தான் செய்தேன்.

கரும்பின் தன்மையைப் பொறுத்து, நமக்கு கிடைக்கும் சர்க்கரையின் அளவு மற்றும் சுவை மாறுபடும். ஆகையால், முதலில் கரும்பை பிழிந்து விற்குமிடத்தில் இருந்து இரண்டு குவளை வாங்கி காய்ச்சி பரிசோதனை செய்து பார்த்தப் பின், அதிக அளவில் காய்ச்சி தொடங்குங்கள். 

கரும்பு ஜீஸ் விற்பவர்கள் புதினா, இஞ்சி ஆகியவற்றை சேர்ப்பதுபோல எதையும் சேர்க்கலாமா என்பதுபற்றி தெரிந்தவர்களிடம் கேட்டுக் கொள்ளுங்கள் அல்லது இரண்டு முறைப்படியும் தயாரித்து, எது சிறப்பாக இருக்கிறது என பார்த்து சொல்லுங்கள்.

எது எப்படி இருப்பினும், விற்பனைக்கு என மொத்தமாக உற்பத்தி செய்யும் இடத்தில் சுத்த மிருக்காது. அந்த வேலையில் ஈடுபட்டு இருப்பவர் களும் சுத்தமாக இருக்க வாய்ப்பே இல்லை.

இப்படி, எது ஒன்றையும் நாமே தயாரிக்கும்போது சுத்தத்தைப் பற்றி கவலைப்பட தேவையே இல்லை. 

இப்படி, சத்தியவான் காந்தியவர்கள் இந்திய தன்னாட்சி நூலில் சொன்னபடி, மக்கள் தற்சாற்பு வாழ்க்கை வாழ எத்தனை எத்தனையோ வழி முறைகள் இருந்தும், அதுபற்றி சிந்திக்காமலும், அதன்படி வாழ முற்படாமலும் வெள்ளையர்களை விஞ்சிய கொள்ளையர்களாக திகழும் அரசியல் வியாதிகளை நம்பிக் கொண்டு இருக்கிறார்கள்.

கூடுதல் சேர்க்கை நாள்: 18-11-2017

சர்க்கரைக் கரும்பு பல்வேறு நோய்களை குணப்படுத்தும் ஆற்றல் கொண்டதாம்!
ஆகையால், பைத்தியம் உள்ளிட்ட தீராத வியாதிக் காரர்கள் தினந்தினம் முடிந்த அளவுக்கு தின்றுவர நோய்கள் தீருமாம்!!
மடையர்கள் கூட புத்திசாலி ஆகி விடுவார்களாம்!!!
14 ஆண்டுகளுக்கு முன்பே, எலும்புப் புற்றுநோயால் இறந்து விடுவாய் என மருத்துவர்களால் கைவிடப் பட்டவர், இப்படி தின்று தற்போது வரை நலமாக இருக்கிறார். 

இதற்காவே, சிறிய கரும்புத் தோட்டம் ஒன்றையும், இயற்கை முறையில் பயிரிட்டு வைத்துள்ளார்.   
இவ்வளவு நன்மை தரும் கரும்பை, சீனி தயாரிக்கிறேன் என்றப் பெயரில் எப்படி எல்லாம் நாசமாக்குகிறார்கள் என்ற இக்கட்டுரையை எழுதிய ஒரு மாதத்திற்கு பின்பே இச்செய்தி தெரிந்தது.
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Thursday, October 19, 2017

இளைஞர்களே, ஆன்டிகளிடம் எச்சரிக்கை!


தங்களை விட வயதில் மூத்த பெண்களோடு பழகுவதால், இளைஞர்கள் எப்படிப்பட்ட பிரச்சினை களை எல்லாம் சந்திக்க வேண்டி இருக்கிறது என்று, எனது கவனத்திற்கு வந்த சில சம்பவங்களை ‘‘மநு வரையுங்கலை!’’ நூலில் எழுதி உள்ளேன். 

இப்படியொரு பெண் உன்னை பாச வலைவீசிப் பிடிக்கிறாள் என்றால், அவள் உன்னையும் உன் வருமானத்தையும் நிரந்தரம் ஆக்கிக் கொள்ளவே முயல்வாள் என்பதையும், இதனால் உன் வாழ்வு பாழாகும் என்பதையும் உணர்ந்துக் கொள்!

இது புரியாமல், ‘‘கல்லாணம் ஆகும் வரை அவளோடு பாலியல் உறவில் இருக்கலாம், அனுபவம் பெறலாம்’’ என நம்பினால் உன்னைப்போல் முட்டாள் இருக்க முடியாது. 


ஆமாம், ஆன்டிக்கு ஆசைப்பட்டு, ஆண்டியாய் போன இளைஞர்கள் பலர். அப்படிப்பட்ட ஒரு இளைஞனுக்கு நடந்த சங்கதிதான் இது. 

எனக்கு தெரிந்த, நல்ல உழைப்பாளி இளைஞன் ஒருவனை, அவனுக்கு ஒன்னு விட்ட பங்காளி முறை சித்தி அழைத்துக் கொண்டு போய், கோவிலில் வைத்து தாலி கட்டிக் கொண்டு குடும்பம் நடத்த ஆரம்பித்து விட்டாள். அவள் அப்படி செய்த போது, இவனுக்கும், அவளுக்கு 12 வயது வித்தியாசம்.

மேலும், அவளுடைய முதல் பையனுக்கு 20 வயது. இவனொரு இளம் பெண்ணை கர்ப்பமாக்கி, அது குறித்து ஊரில், பணம் பறிக்கும் பஞ்சாயத்து நடந்தது. அது என்னவானது என தெரியவில்லை. 2 வது பையனுக்கு 18 வயது. கணவன் வேறு இருக்கிறான். இவர்களுக்கு என்று நில புலன்கள் எதுவும் கிடையாது.

ஆனால், அவள் அழைத்து சென்ற இளைஞன் வசதி யானவன். அவனுடைய சொத்துக்களை அடையவே இப்படியொரு திட்டம்.

இவர்கள் சொந்த ஊரில் வாழ முடியாது என்பதால், வெளியூரில் அக்கா, தம்பி என பொய்ச் சொல்லி குடும்பம் நடத்திக் கொண்டிருக்கிறார்கள்.

அதாவது, அக்காவை விட்டு விட்டு மாமன், வேறு ஒருத்தியோடு ஓடிப்போய் விட்டான். ஆகையால், நான்தான் காப்பாற்றுகிறேன் என்று கதையைச் சொல்லி வாழ்ந்து வருகிறார்கள்.

இவர்கள் அக்கா, தம்பியல்ல என ஓரிடத்தில் உண்மை தெரிய வரும்போது, வேறு இடத்திற்கு குடிமாறி விடுவது என கடந்த 7 ஆண்டுகளில், 15 வீடுகளுக்கு மாறி விட்டார்கள். 

இதுபோன்ற சட்ட விரோத செயல்களுக்கு ஆதரவு தரும் ஒரு பொய்யரின் வீட்டில் மட்டும் சுமார், 1 வருடத்திற்கு மேல் வாழ்ந்திருக்க, திருமணம் ஆன அப்பொய்யரோ, வேறொரு பெண்ணுடன் காதல் தோல்வி என தீக்குளித்து தற்கொலை செய்து கொண்டதாக கணக்கு. இது, பத்திரிகையிலும் செய்தியாக வெளிவந்தது.  

இவனை அழைத்துச் சென்றவள், ஆரம்பத்திலேயே இவனது பெயரில் இருந்த சொத்துக்களை எல்லாம் தன் பெயருக்கு மாற்றி, பின் அவளது கணவன், குழந்தைப் பெயர்களுக்கு மாற்றி விட்டாள்.

இவன் தினமும் காலையில் கிளம்பி, நாள் முழுவதும் ஆட்டோ ஓட்டி,  ஆயிரங்களை கொண்டி கொடுத்தாலும், இரவு ஒரு வேளை சோறு போடுவதற்கே பத்தவில்லை என்கிறாளாம்! 

இப்படிப்பட்டவள் சும்மா இருப்பாளா... இவன் வெளியில் போன பிறகு, கண்டவனெல்லாம் வீட்டுக்கு வந்து போகிறார்களாம். பின்ன வரச் சொல்லாம என்ன செய்வாள்?

இப்போது சொந்த ஊரில் உள்ள இவனது அம்மா வசிக்கும் வீட்டில் சென்று வசிக்கலாம் வா என, ‘‘இவளை என்னமோ உற்றார் உறவினர்கள் பெண் பார்த்து திருமணம் செய்து வைத்தைப் போல அழைக்கிறாளாம்’’. 

இது, மீதமுள்ள அந்த வீட்டையும் கைப்பற்றுவதற்கான திட்டம். ஆமாம், இவளது ஊரும் அதே ஊர்தான். முன்பின் மூன்று தெருக்களே! 

அங்கு இவளது கணவனும், மகன்களும் எந்தவொரு வேலை வெட்டிக்கு செல்லாமலேயே, இன்றும் மிகவும் சொகுசாக வசித்து வருகிறார்கள். இது எனக்கும் நன்றாகவே தெரியும்.

சொத்து, பணம் உள்ளிட்டவற்றை பறிக்க வேண்டும் என்கிற கெட்ட நோக்கத்துடன் அவனை அழைத்துச் செல்லாதவளாக இருந்தால், எப்படி கணவனும் குழந்தைகளும் வசிக்கும் ஊரிலேயே வாழ வா என தில்லாக அழைப்பாள்?

இவன் தினமும் ஆட்டோ ஓட்டி சம்பாதிக்கும் ஆயிரக் கணக்கான பணமும் கூட, சொகுசு வாழ்க்கை வாழ்வதற்கு கணவனுக்கு வந்து விடுகிறது என்பது, இப்போது அவனைப் போலவே உங்களுக்கும் புரிந்திருக்கும். 

இந்த கொடுமையில் சிக்கிக் கொண்டு எப்படி வெளி வருவது என தெரியாதவன், முழுமையாக குடியில் மூழ்கி விட்டான். அவளது வீட்டுக்கும் செல்லாமல், ஆட்டோவிலேயே படுத்து விடுவது; சக ஆட்டோக் காரர்களது வீட்டில் தங்குவது என்ற நிலையில், ஒவ்வொரு காலத்தையும் ஓட்டி வருகிறான்.   

அவனது கல்வி அறிவற்ற வயதான அம்மா செத்து விட்டால், இவனுடைய தாலி கட்டிய மனைவி என தகராறு செய்து, இருக்கிற ஒரு வீட்டையும் கைப்பற்றி விட திட்டம் போட்டுள்ள அவளோ, ‘‘இவனது அம்மாவுக்கு தினமும் இரவு பத்து மணிக்கு மேல் போனைப் போட்டு பேசிப்பேசி தூங்க விடாமல், டென்ஷன் செய்து விடுகிறாள்’’. 

இவள் போதாதென்று, ‘‘என்னை ஏன் பெத்த...  உன் கையாலேயே விஷம் கொடுத்து என்னை கொன்று விடு’’ என மகனும் மாறிமாறி தொந்தரவு செய்ய, இந்தம்மா உடல் நலங்குன்றி படுத்து விட்டது. 

இப்போது, அவன் அவளது வீட்டுக்கும், சொந்த ஊருக்கும் போக முடியாத நிலையில், தற்கொலை செய்துக் கொள்ளும் நிலையில் திரிந்துக் கொண்டு உள்ளான். 

இவனுக்கு அப்போது நான் சொன்ன ஆலோசனைகள் காதில் கேட்கவில்லை. இப்போழுது கேட்டுப் பயனில்லை என்கிற நிலையில் அழுகிறான். அப்போது நான் சொன்னதை கேட்காமல் விட்டிருந்தால் கூட பரவாயில்லை. அவள் மீதிருந்த மோகத்தில், அதனை அப்படியே அவளிடமும் சொல்லி விட்டான். 

இப்படி, ஊருக்கு, தெருவுக்கு ஒன்றிரண்டு இளைஞர்களாவது வாழ்க்கையை இழந்து இருக்கிறார்கள். எனவே, இளைஞர்களே எச்சரிக்கை!
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Tuesday, October 17, 2017

கொலைக் குற்றவாளிகள் விடுதலை!


பிணை அல்லது விடுதலை உத்தரவு சிறைக்கு கிடைத்த உடனே (சிறை ஆவணப் பராமரிப்புக்கு ஒரு மணி நேரம் ஆகலாம்) அவர்களை சிறையில் இருந்து விடுவிக்க வேண்டும். 

ஆனால், இவ்விரு கொலைக் குற்றவாளிகளை விடுவிக்க நான்கு நாட்கள் ஆக்கி இருக்கிறார்கள். விடுதலை உத்தரவு சிறைக்கு கிடைக்க வில்லையா அல்லது கிடைத்து சிறை ஊழியர்கள் தாமதித்து உள்ளார்களா என்பது தெரியவில்லை.

சிறையில் மருத்துவம் பார்த்தாகவும், அதற்கான அரசின் ஊதியத்தைப் பெற்றுக் கொள்ள மறுத்து விட்டதாகவும் சொல்கிறார்கள்.

மகள் கொலை வழக்கில் இருந்து விடுதலை ஆவதற்காக நான் செய்த செலவில், ஆயிரத்தில் ஒரு சதவிகிதம் கூட வராத கூலியை வாங்கி நான் என்ன செய்யப் போகிறேன் என்ற நிலைப்பாடாகவே இருக்கும். 

ஆமாம், அரிய வகை மானை வேட்டையாடிய வழக்கில் இருந்து சல்மான் கான் விடுதலையாக 25 கோடி வரை செலவு செய்யதாக அவரின் அப்பா, பத்திரிகைக்கு பேட்டி அளித்து இருந்தார். 

அப்படியானால், வழக்கை விசாரணை செய்தவர்கள் எப்படிப்பட்ட கொள்ளையர்கள் என்பதை சொல்லவே தேவையில்லை.


சரி, நான் எப்படி இவர்களே குற்றவாளிகள் என தீர்க்கமாக சொல்கிறேன் என்றால், தங்களது மகளையும், வீட்டில் வேலை பார்த்த ஊழியரையும் கொலை செய்தது இவர்கள் இல்லை என்றால், இவ்விரு கொலை மீதும் இவர்கள் அல்லவா புகார் கொடுத்து இருக்க வேண்டும்?

இவர்களது மகளை வேலைக்காரர் கொலை செய்து விட்டார் என்று வைத்துக் கொண்டால் கூட, வேலைக்காரரை கொலை செய்தது யார்? அவரே செய்துக் கொள்ள முடியுமா?! 

வேலைக்காரர் வேறிடத்தில் கொலை செய்யப்பட்டு இருந்தால் கூட இவர்களுக்கு கொலையில் சம்பந்த மில்லை என விட்டு விடலாம். 

ஆனால், பிரேத பரிசோதனை அறிக்கையின்படி, இவர்களது வீட்டில், இவர்களுக்கே தெரியாமல், ஒரே நாளில், எப்படி இரு கொலைகள் நடக்கும்?? 

சாதாரணமாக நமக்கு எழும் இக்கேள்விகள் நிதிபதி களுக்கு எழாமல் போக காரணம், அக்குற்றவாளிகள் கொடுத்த நிதியைத் தவிர வேறென்னவாக இருக்க முடியும்?! 
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

நூல்களின் முகப்பு

நியாயந்தான் சட்டம்

Follow by Email

Followers

முக்கியப் பக்கங்கள்

அடிப்படை சட்டங்கள்

  • 1. இந்திய சாசனம் 1950
  • 2. நீதிமன்ற சாசனம் 1872
  • 3. இந்திய தண்டனை சட்டம் 1860
  • 4. குற்ற விசாரணை முறை விதிகள் 1973
  • 5. உரிமையியல் விசாரணை முறை விதிகள் 1908

நம் நூல்களைப் பற்றி

நீதியைத்தேடி.... நீங்களும் நீதிமன்றத்தில் வாதாடலாம் வரிசையில்...
1 குற்ற விசாரணைகள்
2 பிணை (ஜாமீன்) எடுப்பது
எப்படி?
3 சட்ட அறிவுக்களஞ்சியம்
4 சட்டங்கள் உங்கள் பாக்கெட்டில்
5 சாட்சியங்களைச் சேகரிப்பது
எப்படி?
6 கடமையைச் செய்!
பலன் கிடைக்கும்
7 மநு வரையுங்கலை!Recent Posts Widget

இந்நூல்கள் அனைத்தும் உங்களின் சட்ட விழிப்பறிவுணர்வுக்காக
மத்திய சட்டம் மற்றும் நீதியமைச்சகத்தின் நிதியுதவியோடு
தமிழ்நாடு மற்றும் புதுச்சேரியில் உள்ள நான்காயிரத்துக்கும் மேற்பட்ட பொது நூலகங்கள், மத்திய சிறைச்சாலைகள் மற்றும் சென்னை உயர்நீதிமன்றம் உள்ளிட்ட நீதிமன்றங்களுக்கு வழங்கப்பட்டுள்ளன.

சொந்தமாக தேவைப்படுவோர், உ(ய)ரிய நன்கொடையைச் செலுத்திப் பெற்றுக் கொள்ளலாம். தொடர்பு வாட்ஸ்அப் எண் 09842909190 ஆகும்.

எல்லாப் பதிவுகளும்!

நம் தள வகைகள்

பயின்றோர் (20-08-16)