நீ வாழ... நீயே வாதாடு... வரவேற்பு வாழ்த்து!

No law, no life. Know law, know life! என்ற நமது அடிப்படைக் கொள்கை தத்துவத்திற்கு இணங்க சட்ட விழிப்பறிவுணர்வின் (அ)வசியத்தை உணர்ந்து, ‘‘நீதியைத்தேடி... சட்டப் பல்கலைக் கழகத்திற்கு’’ வருகை தந்துள்ள உங்களை வருக என வரவேற்று, உங்களுக்கான சட்ட விழிப்பறிவுணர்வைப் பெற்று பயனைப் பெறுக என வாழ்த்துகிறோம்!
முக்கிய அறிவிப்பு : இந்த இணையப்பக்கத்தை புதுப்பிக்கும் பணி நடந்துக் கொண்டிருப்பதால், சில பதிவுகள் அல்லது இணைப்புக்கள் கிடைக்காமல் போகலாம்!

Tuesday, August 23, 2016

தன் வழக்கில் தானே வாதாடுபவர்



வழக்கு என்றால், பெ(று, ரு)ங்கூலிக்கு மாரடிக்கும் பொய்யர்கள்தான் வாதாடுவார்கள். ஆகையால், யாருக்காக எப்பொய்யர் ஆலோசகராக இருந்து பொய்ப்பேசுகிறார் என்பதை நிதிபதிகள் தெரிந்துகொள்ள வேண்டு மென்பதற்காக, மனுவிலும், மேலட்டையிலும் பொய்யர்கள் தங்களின் பெயர்களை குறிப்பிட்டுக் கொள்வார்கள்.
ஆனால், உங்களுக்காக நீங்களே வாதாடும்போது, உங்களுக்கு ஆலோசனை சொல்ல பொய்யர்கள் யாரும் இருக்கமாட்டார்கள். இந்த வெற்றிடத்தை நிரப்பாவிட்டால் நிதிபதிகளுக்கு ஏதோ குறையிருப்பது போல தலை வலிக்கும் போலிருக்கிறது. அதாவது மாட்டு மந்தையில, மாடுகள் குறைந்தால், மாடுமெய்ப்பவருக்கு மனம் ஒருமாதிரி கஷ்டப் படுந்தானே!
ஆகையால், அந்த வெற்றிடத்தில் தனக்குத்தானே வாதாடுகிறார் என்பதை குறிக்கும் விதமாக, ஆங்கிலத்தில் ‘‘பார்ட்டி இன் பெர்சன்’’ என்று குறிப்பிடும் வழக்கத்தை நிதிபதிகள் உருவாக்கி வைத்திருக்கிறார்கள். இதனை நாமும் கட்டாயமாக கடைப்பிடிக்க வேண்டுமென்ற அவசியமே கிடையாது.
ஏனெனில், பெ(று, ரு)ங்கூலிக்கு மாரடிக்கும் பொய்யர் களைப் போல, உங்களது வழக்கிற்கு நீங்கள் வேலைக்காரன் கிடையாது. மாறாக, முதலாளி!
ஆமாம், ‘‘கடமையைச் செய்! பலன் கிடைக்கும் நூலில், நீங்க என்ன படிச்சிருக்கீங்க!? என்ற தலைப்பில், உங்களுக்காக ஒரு பொய்யர் வாதாடும்போது, உங்களுக்காக அவர் தாக்கல் செய்யும், உங்களது கையொப்பத்துடன் கூடிய வக்காலத்தில், வேறொரு பொய்யர் முன்னரே, நீங்கள், உங்களது பொய்யரை நியமித்தீர்கள் என்பதற்கு சான்றொப்பம் வாங்க வேண்டுமென்றும்..,
உங்களுக்காக தாக்கல் செய்யும் பிரமாண வாக்கு மூலத்தில், உங்களுக்காக பொய்ப்பேசும் பொய்யர் சான்றொப்பமிட முடியாது. மாறாக வேறொரு பொய்யர்தான் சான்றொப்பமிட முடியுமென்றும், ஆனால், நீங்களே முதலாளியாக இருந்து வழக்கை நடத்தும்போது, நீதிமன்ற சாசன உறுபு 70 இன்படி, நீங்கள் ஒப்பமிட்டாலே போதுமானது என்பதை, பல்வேறு விளக்கங்களுடன் சொன்னது’’,நினைவிருக்கும்.
ஆகையால், நீங்களே முதலாளியாக இருந்து வழக்கை நடந்தும்போது, கூலிக்கு மாரடிக்கும் பொய் வேலைக்காரப் பொய்யர்கள் உங்களுக்காக செய்யும், பொய்யான ஜோடனைகளை எல்லாம், உண்மையாக இருக்கும் நீங்கள் எதற்காகவும் செய்து, உங்களின் உண்மைத் தன்மையை குறைத்துக் கொள்ளாதீர்கள்.
நிதிபதிகள் எழுதும் தீர்ப்புகளில், யார் யாருக்காக, எந்தெந்த பொய்யர்கள் வாதாடினார்கள் என்பதை குறிப்பிட வேண்டிய கட்டாயம் அவர்களுக்கு இருப்பதால், அவர்கள் வேண்டுமானால், உங்களுக்காக நீங்களே வாதாடினீர்கள் என்றெழுத வைத்து பெருமைப் படுங்கள்.
வெளிவர உள்ள மநு வரையுங்கலை நூலிலிருந்து…
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Saturday, August 20, 2016

நிதி அடிமைகளின் விடுதலை?!


எல்லா நிதிபதிகளும் ஓய்வு நாளன்று நடக்கும் பிரிவு உபச்சார விழாவில் தவறாது, நீதித்துறையில் சீர்த்திருத்தம் தேவை… நீதித்துறையில் நீதி கேள்விக்குறியாகி விட்டது… பொய்யர்கள் நீதிமன்றத்தை புறக்கணிக்க கூடாது என்பது உள்ளிட்ட பல்வேறு குற்றச்சாற்றுகளை சொல்லிவிட்டு போகிறார்கள்.
இதையெல்லாம் அவர்கள் பணியில் இருக்கும்போதே சொல்லவோ, சீர்த்திருத்தம் செய்யவோ முடியாதுங்களா அய்யா என்று, ஒருவர் என் கருத்தை கேட்கிறார். கேட்பது முற்றிலும் நியாயமான கேள்விதான்!
பலபேருக்கு இந்தகேள்வி எழுந்தாலும், யாரிடம் போய் கேட்பது என்று புரியவில்லை. இப்படி கேட்டவர் கூட, என் பெயரை போடாதீர்கள் என்கிறார்.
2010 ஆம் ஆண்டில், வெளியான நீதியைத்தேடி… சாட்சியங்களைச் சேகரிப்பது எப்படி? நூலின் தொடக்க தலைப்பே, ‘நீதித்துறையில் தேவை சீர்த்திருத்தம்’என்பதுதான். இதில் சொல்லப்பட்ட கருத்துக்களும் இதுதான்.

1613789_10203150651550227_1154455611_n
‘‘எந்தவொரு துறையிலும் சீர்த்திருத்தம் தேவை என்பதை வலியுறுத்த, பலரும் தயாராக இருக்கிறார்கள். ஆனால், நீதித்துறை சீர்த்திருத்தம் பற்றி வாய்திறக்கவே பயப்படுகிறார்கள். எப்போதாவது ஏதாவதொரு அசம்பாவிதம் போல் பிரதமர் அல்லது சட்ட அமைச்சர் அல்லது ஓய்வு பெற்ற நீதிபதிகள் என வாய் திறந்தால் உண்டு. அதுவும், அத்தோடு சரி!
அதிலும், ‘‘ஒய்வு பெற்ற நீதிபதி தனது அதிகாரம் மிக்க பதவிக்காலத்தில் எதையும் செய்யாமல், ஓய்வு பெற்றப்பின், பல் பிடுங்கப்பட்ட பாம்பு போல சீறிக்கொண்டு இருப்பார்’’. அதிகாரம் பெற்றவர்களே, உள்ளவர்களே, வாய்திறக்க மறுத்தால் சாதாரண மக்கள் முதல் மற்றவர்கள் வரை, எப்படிக் குரல் கொடுப்பார்கள்?
நீதித்துறையில் சீர்த்திருத்தம் குறித்து மறைமுகக் கருத்துக் கணிப்பு நடத்தினால் (இப்போது நேரடிக் கருத்துக் கணிப்புக்கு கூட சிலர் தயார்) நீதித்துறைக்கு படுதோல்வியே மிஞ்சும் என்ற அவல நிலையில்தான், மக்கள் நீதிமன்றங்களை பார்க்கின்றனர். உலகின் மிகப்பெரிய குடியரசுக்கு ஏற்பட்டுள்ள இந்த அவலம், விரைவில் சீர்த்திருத்தம் செய்யப்பட வேண்டும்.
நம்மைப் பார்த்தால் எல்லோருக்குமே ஒரு பயம் வர வேண்டும் என, அதிகாரம் பெற்ற அனைவருமே ஆணவத்தில் இருக்க, ஆதிக்க ஆணவத்தில் இருப்பது நீதிபதிகளே.
‘‘நல்லவேளையா கடவுள் மாதிரி வந்து காப்பாத்துனீங்க!’’ இல்லேன்னா அவ்வளவுதான்…? என்பதை அடிக்கடி சாதாரணமாக மக்கள் சொல்லக் கேள்விப்பட்டிருப்பீங்க. யாரைப்பார்த்து இப்படி பக்தியோடும், அன்போடும் சொல்கிறார்கள் என்று பார்த்தால், சாதாரண மக்களாகத்தான் இருப்பார்கள். இதுக்கு உண்மையான அர்த்தம் என்ன? ‘‘கடவுளே செய்யாத செயலை, நீங்க செய்து காப்பாத்துனீங்க’’ என்பதுதானே!
இதுபோல, மக்கள் எந்த நீதிபதியைப் பார்த்தாவது சொல்லியிருப் பார்களா? என்றால் நிச்சயமாக இல்லை. அந்த அளவிற்கு நீதிமன்றம் என்றாலே, மக்களுக்குப் பீதியும், பேதியும்தான் ஏற்படுகிறது.
ஒருவேளை, அப்படியே சொல்லியிருந்தாலும் கூட, அது அதிகாரத்திற்கு பயந்துதான் இருக்குமே தவிர, உண்மையானதாக ஒருக்காலும் இருக்காது. இருக்கவும் முடியாது. மேலும், அதிகாரம் உள்ளவர்களை, எவ்வளவுக்குக் எவ்வளவு புகழ்கிறார்களோ, அதை விடப் பன்மடங்கு மேலாக பின்னால் இகழ்வார்கள் என்பதும் உங்களுக்குத் தெரியும்தானே!?’’
இதில், வேற்றுமையில் ஒற்றுமை என்னவென்றால், அந்த வருடந்தான், நானும் பத்து வருட சட்ட ஆராய்ச்சியை நிறைவு செய்து வெளியேறினேன்.
இதையெல்லாம் செய்யமுடியும் என நம்பியிருந்தால், நான் சட்ட ஆராய்ச்சியை ஆரம்பிக்காமல், எப்போதோ நீதித்துறைக்குள்ளே போயிருப்பேனே?!
இதுக்கெல்லாம் ஆசைப்பட்டு, எதுக்கு உள்ளேபோயி அடிமையாய் இருப்பானேன், என்றுதான் போகாமல், நிதிபதிகள் குறித்த விழிப்பறிவுணர்வை ஏற்படுத்துகிறேன்.
பொதுவாக அடிமைகளுக்கு விடுதலை நிச்சயமானதும்தான், அதுவரை தான் சந்தித்து வந்த கொடுமைகளை எல்லாம் வெளியில் சொல்வார்கள் இல்லியா? இதில் நிதிபதிகள் மட்டும் விதிவிலக்காகி விடமுடியுமா என்ன?
நிதிபதிகள் என்றைக்கு விடுதலையாகிறார்களோ, அன்றைக்குதானே அவர்களாலும் வாய்திறந்து பேசமுடியும்!
இதிலென்ன கருத்து சொல்லவேண்டியிருக்கு?
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Wednesday, August 17, 2016

அடிமைப் பொய்யர்கள் போராடமாட்டார்கள்!



சட்டத்தொழில் செய்யும் பொய்யர்கள், அடிப்படையில் சட்டந்தெரியாத பொய்யர்கள் மட்டுமல்லர்; அடிமைகளும் ஆவர்!
இப்பொய்யர்கள் தாங்கள் அடிமையாய் இருப்பது மட்டுமல்லாமல், இச்சமூகத்தையே அடிமையாய் வைத்திருக்கின்றனர்.
இப்பொய்யர்களின் புறம்போக்குத்தனமான செயல்களை முறைப்படுத்த, நிதிபதிகளால் கொண்டு வரப்பட்ட சட்டத்திருத்தங்களை, ‘‘மக்களின் நலன்களுக்கு எதிரானது’’ என்று பொய்ச்சொல்லி, கடந்த 70 நாட்களுக்கும் மேலாகப் போராடி வந்தனர்.
ஆனால், மக்களிடம் இப்பொய்ப் பிரச்சாரம் எடுபடாமல் பிசுபிசுத்துப் போகவே, பிழைக்க வேறு வழியின்றி போராட்டங்களை கைவிட்டு, மீண்டும் தங்களின் அடிமைத் தொழிலை தொடர்வதென்ற முடிவுக்கு வந்துள்ளனர்.
இதனை ஏற்றுக்கொண்ட இப்பொய்யர்களின் அகில இந்திய அவையின் நிர்வாக கூட்டுக்களவாணிகள், போலியாகப் போராடிய பொய்யர்களின் மீது எடுக்கப்பட்ட தற்காலிக நீக்கத்தை, அப்பொய்யர்கள் அடிமைகளாய் அடங்கிப் போகும் தன்மையைப் பொறுத்து இறுதி முடிவெடுப்பதாகக் கூறியுள்ளனர்.
மொத்தத்தில், இவ்வடிமைப் பொய்யர்களை நம்பும் எவரும், இந்த அடிமைகளுக்கே அடிமையாகத்தான் இருக்க முடியுமே தவிர, ஒருபோதும் உரிமையோடு வாழயியலாது!
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Monday, August 15, 2016

மறு புலனாய்வுக்கு மறுப்பு தெரிவிப்பது எப்படி, ஏன்?



“மநு வரையுங்கலை!” நூலில் குற்றவியல் பகுதியில், நாம் கொடுக்கும் புகாரின் மீது காவலூழியர்கள்,‘‘பிழையுள்ள குற்றம்’’ என்று சட்ட விதிகளில் இல்லாத வெற்று அறிக்கையை கொடுப்பதை வாடிக்கையாக வைத்திருக்கிறார்கள் என்றும், அதனை ஆட்சேபிப்பது எப்படி என்பதை சொல்லியிருந்தேன்.
அந்த ஆட்சேபனை மீது என்ன முடிவெடுப்பது என்று புரியாமல், கடந்த 06-08-2016 அன்று, உதகையில் மாவட்ட நிதிபதி உள்ளிட்ட கீழ்மட்ட நிதிபதிகள், அரசுப் பொய்யர்கள் உள்ளிட்ட அரசு உதவிப் பொய்யர்கள் மற்றும் மாவட்ட தலைமை காவலூழியர்கள் உள்ளிட்ட கீழ்மட்ட காவலூழியர்கள் எல்லாம் ஒன்றாக கூடி, கலந்தாய்வுக் கூட்டம் போட்டிருக்காங்க!
இக்கூட்டுக் களவாணிகளின் அக்கலந்தாய்வுக் கூட்டம் சுமார் ஐந்து மணி நேரம் நீடித்துள்ளது. இதில், இனி வாரியம், கழகம் போன்றவற்றில் இருந்து புகார் வந்தால், இதுபோன்று பிழையுள்ள குற்றமென அறிக்கையை காவலூழியர்கள் தாக்கல் செய்யக்கூடாது என்று முடிவெடுக்கப்பட்டுள்ளது.
இதே முடிவை சாதாரண மக்கள் தாக்கல் செய்யும் புகார்களின் மீதும் எடுக்க வைக்க வேண்டியது, வழக்கை நடத்தும் உங்களின் கடமையே ஆகும்.
மேற்குறிப்பிட்ட அந்த மின்வாரிய வழக்கிலிருந்து வெற்று அறிக்கை தாக்கல் செய்த காவல் உதவி காவலூழியரை காப்பாற்றும் விதமாக, அரசுத்தரப்பின் உதவிப் பொய்யர், ‘‘மறு புலனாய்வுக்கு’’ உத்தரவிடும்படி, நடுவரிடம் கோரிக்கை வைத்துள்ளார்.
இதுபோன்ற வழக்குக்களில் மறு புலனாய்வுக்கு உத்தரவிட்டால் என்ன நடக்கும் என்பது குறித்து விளக்கும் ஆட்சேபனை மனுவை புகார்தாரர் தாக்கல் செய்துள்ளார். இது உங்களுக்கும் நிச்சயம் பயன்படும் என்பதால் வெளியிட்டுள்ளேன்.
நீதித்துறை நடுவர் மன்றம்
உதகமண்டலம்
ஆர்.சி.எஸ்.நெ 78 / 2010
உள்
ஜே2 காவல் நிலைய குற்ற எண் 80 / 2009
இரா. செல்வகணபதி – குற்ற முறையீட்டாளர்
குற்ற விசாரணை முறை விதிகள் 1973 இன் விதி 2(7) இன்கீழ், பரிசீலனை மனு
1. மேற்படி வழக்கில் நான் குற்ற முறையீட்டாளர் ஆவேன். இது, சூழ்நிலைக்கேற்ப நான் தாக்கல் செய்யும் இரண்டாவது மற்றும் நான்கு பக்க ஆட்சேபனை மனுவாகும்.
2. இம்முறையீட்டின் மீது ஏற்கெனவே கடந்த 07-10-2015 அன்று எனது விரிவானதொரு ஐந்து பக்க ஆட்சேபனை உரையை தாக்கல் செய்துள்ளேன். இதன் நகலை, நம் உயர் அதிகாரிகளுக்கும் சமர்ப்பித்துள்ளேன். இப்படியே இவ்விரண்டாவது ஆட்சேபனை மனுவும், நம் உயர் அதிகாரிகளுக்கு சமர்ப்பிக்கப்படுகிறது.
3. முதல் ஆட்சேபனை மனுவைத் தாக்கல் செய்தப் பிறகு பல வாய்தாக்கள் போடப்பட்டு உள்ளன. இதில் 19-11-2015, 02-02-2016, 15-03-2016, 31-05-2016 அன்றைய விசாரணைகளை உங்களுக்கு முன்பாக இருந்த நடுவர் நடத்தினார்.
4. இதில் தாங்கள் மட்டுமே 28-06-2016, 12-07-2016, 20-07-2016 மற்றும் 28-07-2016 ஆகிய தேதிகளில் விசாரணை செய்துள்ளீர்கள்.
5. எனது ஆட்சேபனையின் மீது அரசு வழக்கறிஞரின் ஆலோசனையைக் கேட்டு உத்தரவு பிறப்பிப்பதாக கூறி, 08-08-2016 ஆன இன்றோடு ஐந்து வாய்தாக்களைப் போட்டு உள்ளீர்கள். இதற்கு முன் நான், எனது இம்முறையீடு தொடர்பான வழக்கு விசாரணையில் அரசு உதவி வழக்கறிஞரைப் பார்த்ததேயில்லை.
6. மேலும், கடந்த இரு வாய்தாக்களில் அரசு உதவி வழக்கறிஞர் மீண்டும் புலனாய்வுக்கு உத்தரவிடுமாறு, தங்களிடம் அர்த்தமற்ற கோரிக்கையை வைத்து வருகிறார்.
7. அப்படி தாங்கள் மறு புலனாய்வுக்கு சட்ட விதிப்படி உத்தரவிட முடியுமா என்பதையும், அப்படி உத்தரவிட்டால், அதனையடுத்து என்ன நடக்கும் என்பதை தெளிவுபட உங்களுக்கு எடுத்து உரைக்கவே இந்த ஆட்சேபனை உரையை உங்களின் பரிசீலனைக்காக தாக்கல் செய்கிறேன்.
8. இம்முறையீட்டு உள்ளான மின்மாற்றியின் உள்ளே உள்ள தாமிர கம்பிச்சுருளை, மற்ற தாமிரப் பாத்திரங்களை கடையில் வாங்குவதுபோல விலைகொடுத்து வாங்கிவிட முடியாது.
9. ஏனெனில், இத்தாமிர கம்பிச்சுருளை பிரத்தியேகமாக உற்பத்தி செய்வது, ‘‘கோவையில் அமைந்துள்ள மின் வாரியத்தின் ஓர் உட்பிரிவான சிறப்புப் பராமரிப்புப் பிரிவே’’ ஆகும்.
10. ஆமாம், மின்மாற்றியில் பழுது ஏற்பட்டால், அதன் பொறுப்புக் கட்டுப்பாட்டில் உள்ள நாங்களே கூட எதுவும் செய்யமுடியாது. அதனை அப்படியே கழற்றி மத்திய பண்டகச் சாலையின் குந்தா அலுவலகத்திற்கு அனுப்பி வைப்போம். அவர்கள் கோவையில் உள்ள சிறப்புப் பராமரிப்புப் பிரிவுக்கு அனுப்பி வைப்பார்கள்.
11. பழுதை சரி செய்தோ அல்லது புதிதாகப் பெற்றே மீண்டும் பொறுத்துவதற்கு தேவையான நடவடிக்கைகளை மேற்கொள்வது குந்தாவில் உள்ள மத்திய பண்டகச் சாலையின் பொறுப்பு.
12. எனவே, அரசு உதவி வழக்கறிஞர் கேட்பதுபோல மீண்டும் காவல்துறைப் புலனாய்வுக்கு உத்தரவிட்டால், காணாமல்போன கம்பிச்சுருளை கண்டுபிடித்து தர காவல் துறைக்கு இரண்டு வாய்ப்புகள் மட்டுமே உள்ளன.
அவைகளாவன,
அ) ஏற்கெனவே காணாமல்போன மற்றும் இம்முறையீட்டில் உள்ள தாமிரக்கம்பிச் சுருளை காவல் உதவி ஆய்வாளர் என்.பி. இராமகிருஷ்ணன் அப்போதே கண்டு பிடித்து தன்வசம் வைத்துள்ளதை கொண்டு வந்து தங்களிடம் ஒப்படைக்க முடியும் அல்லது,
ஆ) மீண்டும் மின் வாரியத்தின் மின்மாற்றியில் இருந்து திருடிக்கொண்டு வந்துதான் ஒப்படைக்க முடியும்.
இவ்விரண்டில் அவர்கள் எதைச் செய்வதற்காக மீண்டும் புலனாய்வுக்கு உத்தரவிட காவல்துறை சார்பாக அரசு உதவி வழக்கறிஞர் கோருகிறார் என்பதை எழுத்து மூலமாக அறிவிக்கை கேட்டும், அதன் நகலை எனக்கு வழங்கிடவும் பணிவுடன் கோருகிறேன்.
13. குற்றவியல் நீதி விசாரணையில் காவல்துறை தாக்கல் செய்யப்படும் எந்தவொரு எழுத்து மூலமான செய்தியும், அரசுத்தரப்பு குற்றவியல் உதவி வழக்கறிஞரின் பார்வைக்கு வைக்கப்பட்டு, அவரின் ஒப்புதலைப் பெற்ற பிறகே தாக்கல் செய்வார்கள் என்பது நீங்கள் அறியாதது அல்ல.
அ) இப்படி இருக்கும்போது, குற்ற விசாரணை முறை விதிகளில் இல்லவே இல்லாத மற்றும் சட்டத்துக்குப் புறம்பாக ‘‘பிழையுள்ள குற்றம்’’ என காவல்துறை தயாரித்த அறிக்கைக்கு, அரசுத்தரப்பு உதவி வழக்கறிஞர் எப்படி ஒப்புதல் வழங்கினார்?
ஆ) ஒப்புதல் வழங்கியவர் மீண்டும் புலனாய்வுக்கு உத்தரவிடும்படி எப்படி கேட்கமுடியும்?!
இ) அல்லது அரசு உதவி வழக்கறிஞரின் ஒப்புதலைப் பெறாமலேயே காவல்துறை ‘‘பிழையுள்ள குற்றம்’’ என அவர்களாகவே அறிக்கை அளித்தார்களா?
ஈ) இப்படித்தான் அனுமதி பெறாமல் அளித்தார்கள் என்றால், அதிலெப்படி அரசு உதவி வழக்கறிஞர் தற்போது தலையிட முடியும்?
உ) மீண்டும் புலனாய்வுக்கு உத்தரவிடும்படி, உங்களை எப்படி கேட்க முடியும்?
14. எனது முறையீட்டின்மீது, காவல் உதவி ஆய்வாளர் திரு. பி.என். இராமகிருஷ்ணன் ‘‘சட்டப்படி என்னென்ன செய்திருக்க வேண்டும் என்பதையும், ஆனால் அவற்றையெல்லாம் எப்படி சற்றும் மதிக்காமல், தன் இஷ்டப்படி மீறி செயல்பட்டார்’’ என்பதையும் கடந்த 07&10&2015 அன்று தாக்கல் செய்துள்ள எனது ஐந்து பக்க ஆட்சேபனை உரையில் இரத்தினச் சுருக்க மாகவும், தெளிவுபடவும் எடுத்துரைத்துள்ளேன்.
15. அதில், அப்போழுது அவசியமில்லாததும், தற்போது அரசு உதவி வழக்கறிஞரின் அர்த்தமற்ற கோரிக்கையால் எழுந்துள்ளதுமான, ‘மறு புலனாய்வுக்கு உத்தரவிட முடியுமா’ என்பது குறித்தும், விளக்க அவசியம் உள்ளதுமான ‘புலனாய்வு என்றால் என்ன?’ என்பது குறித்தும், குற்ற விசாரணை முறை விதிகள் அறிவுறுத்துவதென்ன என்பதை விளக்கி மறு பலனாய்வுக்கு உத்தரவிடக்கூடாது என்பதை சட்ட விதிப்படி ஆட்சேபிக்க வேண்டிய கடமைப் பொறுப்பு, தற்போது எனக்கு ஏற்பட்டுள்ளது.
16. குற்ற விசாரணை முறை விதிகள் 1973 இன்விதி 157 இன் அறிவுறுத்தல்படி, கைது செய்வதற்குரிய குற்றத்தை புலனாய்வு செய்யும் கடமையில் உள்ள காவல் அலுவலர், அதுகுறித்த அறிக்கையை உடனே உங்களுக்கு (இவ்விசாரணை மன்றத்துக்கு) அனுப்பி இருக்க வேண்டும்.
17. ஆனால், எனது இம்முறையீட்டை முதலில் 17-04-2009 அன்று பெற்ற உதவி ஆய்வாளர் என்.பி. இராமகிருஷ்ணன், சட்ட விதிப்படி பதிவு செய்ய வேண்டிய முதல் தகவல் அறிக்கையை பதிவு செய்யாமல், இஷ்டப்படி ரசீது வழங்கினார் என்பது உள்ளிட்ட பல்வேறு உண்மைகளை, அவரது எழுத்து மூலமான ஆதார ஆவணங்களுடன், கடந்த 07-10-2015 அன்று தாக்கல் செய்துள்ள ஐந்து பக்க ஆட்சேபனை உரையில் பத்தி 4 முதல் 5 வரையில் எடுத்துரைத்து உள்ளேன்.
18. மேலும், முதல் தகவல் அறிக்கை பதிவு செய்யாதது தொடர்பாக, எனது உயர்மட்ட அதிகாரிகள் 06-08-2009 அன்று, உதவி ஆய்வாளர் என்.பி. இராமகிருஷ்ணனை தொடர்பு கொண்டு கேட்டபோது, காவல்துறை கண்காணிப்பாளரை கலந்தாலோசித்து முதல் தகவல் அறிக்கையைப் பதிவு செய்து தருவதாக சொன்னவர், அவரது உயர்மட்ட அதிகாரிகள் வழங்கிய அறிவுறுத்தலையும் சற்றும் மதிக்காது, எங்களையே திருடர்கள் என்று நேரடியாகச் சொல்லாமல், சம்பந்தப்பட்ட மின் வாரிய ஊழியர்களிடமே விசாரித்து நடவடிக்கை எடுக்க எனக்கு அறிவுறுத்தினார் என்பதையும் கடந்த 07-10-2015 அன்று தாக்கல் செய்துள்ள ஐந்து பக்க ஆட்சேபனை உரையில் பத்தி 6 முதல் 8 வரையில் எடுத்துரைத்து உள்ளேன்.
19. குற்ற விசாரணை முறை விதிகள் 1973 இன்விதி 157 இன்படி, காவல் உதவி ஆய்வாளர் என்.பி. இராமகிருஷ்ணன் உடனே திருட்டு நடந்த மின்மாற்றி அமைந்துள்ள இடத்திற்குச் சென்று, கைரேகை உள்ளிட்ட தடையங்களை சேகரித்து இருக்க வேண்டும்.
20. இத்தடயங்களை எல்லாம், குற்றவாளிகளை அடையாளம் காணும் சட்டப்படி, ஏற்கெனவே இதுபோன்ற திருட்டுக் குற்றத்தில் தண்டனைக்கு உள்ளான நபர்களின் தடையங்களோடு ஒத்துப்போகிறதா என்பதையெல்லாம் சரிபார்த்து, உண்மையான திருடரை கண்டுபிடித்து, இம்மன்றத்தின் முன்நிறுத்தி குற்ற அறிக்கையை தாக்கல் செய்து, உ(ய)ரிய தண்டனையைப் பெற்றுத் தந்திருக்க வேண்டும்.
21. இப்படி, சுமார் ஏழு வருடங்களாக எதையுமே சட்ட விதிப்படி செய்யாமல், இறுதியாக ‘‘பிழையுள்ள குற்றம்’’ என இம்முறையீட்டின் மீது தாக்கல் செய்தது வெற்று அறிக்கை என்பதை கடந்த 07-10-2015 அன்று தாக்கல் செய்துள்ள ஐந்து பக்க ஆட்சேபனை உரையில் பத்தி 9 முதல் 19 வரையில் எடுத்துரைத்து உள்ளேன்.
எனவே, மீண்டும் புலாய்வுக்கு உத்தரவிட கோருவதற்கு எந்தவித சட்டக் காரணங்களும் இல்லை என்பதையும், அப்படி உத்தரவிட்டால், இந்த ஆட்சேபனை உரையின் பத்தி 12 சொல்லப்பட்டுள்ளபடி தான் நடக்கும் என்பதையும், இவ்விரண்டு காரணத்தில் எதனைச் செய்ய இருக்கிறார்கள் என்பதைக் எழுத்து மூலமாக தாக்கல் செய்யக்கேட்டும், கடந்த 07-10-2015 அன்று தாக்கல் செய்துள்ள ஐந்து பக்க ஆட்சேபனை உரையுடன், இந்த ஆட்சேபனை உரையையும் பரிசீலனை செய்து,
இந்திய தண்டனைச் சட்டம் 1860 இன்பிரிவு 19 மற்றும் 20 இன்படி, தெளிவானதொரு தீர்ப்பினை நீதிப்பூர்வமாக உரைக்கும்படி பணிவுடன் கோருகிறேன்.
இதில் சட்டப் பிரச்சினைகள் ஏதுவும் இருப்பதாக தாங்கள் கருதினால், குற்ற விசாரணை முறை விதிகள் 1973 இன்விதி 395 இன்படி, சென்னை உயர்நீதிமன்றத்துக்கு அனுப்பியும், அம்மன்றத்தின் கருத்தை கேட்டறிந்தும், அம்மன்றம் வழங்கும் அறிவுறுத்தலின் அடிப்படையில் உத்தரவை பிறப்பிக்குமாறும் பணிவுடன் கோருகிறேன்.
ஒப்பம்
இரா. செல்வகணபதி (குற்ற முறையீட்டாளர்)
நகல் சமர்ப்பிக்கப்படுகிறது.
1. குற்ற விசாரணை முறை விதிகள் 1973 இன்விதி 395 இன்கீழ், மறு புலனாய்வுக்கு உத்தரவிட முடியுமா என்ற சட்டப்பிரச்சினைக்கு தீர்வு காண்பதற்காக, பொதுப் பதிவாளர், சென்னை உயர்நீதிமன்றம், சென்னை – 600104
2. குற்ற விசாரணை முறை விதிகள் 1973 இன்விதி 404 இன்கீழ், மறு புலனாய்வுக்கு உத்தரவிட்டால், அதுகுறித்த அறிக்கையை சீராய்வு செய்யும் நோக்கில் கேட்பதற்காக, மாவட்ட நீதிபதி, உதக மண்டலம், நீலகிரி மாவட்டம்.
3. மேற்பார்வை பொறியாளர், புனல் மின் உற்பத்தி வட்டம், குந்தா, நீலகிரி மாவட்டம்.
4. செயற்பொறியாளர், மின் நிலையங்கள், மின் நிலையம் – 1, குந்தா, நீலகிரி மாவட்டம்.
5. உதவி செயற்பொறியாளர், சிவில் பிரிவு, எமரால்டு, நீலகிரி மாவட்டம்.
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Sunday, August 14, 2016

சுதந்திரத்தின் சூத்திரம்!


நாட்டில் நடக்கும் அனைத்து செயல்களும் நல்ல விதமாக நடக்க வேண்டும் என்ற அடிப்படை நோக்கத்திலேயே சட்டம் வரையறை செய்யப்படுகிறது. இந்த வரையறையின் முக்கிய குறிக்கோள் சுதந்திரம்!
ஆனாலும், இதற்கு இவ்வளவுதான் சுதந்திரம் என, எது ஒன்றுக்கும் யாரும் வரையறை செய்ய முடியாது என்றாலும் அதிகபட்ச வரையறையை வகுக்க முடியும். அதாவது, உங்களின் சுதந்திரம், மற்றவர்களின் சுதந்திரத்தைப் பறிப்பதாக இருக்கக் கூடாது என்பதே சுதந்திரத்தின் அதிகபட்ச வரையறை.
இதனை மீறும் தன்மையைப் பொறுத்து, இவைகள் குற்றம் மற்றும் பிரச்சினை என இரு முக்கிய பிரிவுகளாக பிரிக்கப்பட்டு, அதன்பின் அவைகள் பல உட்பிரிவுகளாக பிரிக்கப்படுகின்றன. உட்பிரிவுகள் பற்றி பின்னர் பார்ப்போம்.
இரத்தினச் சுருக்கமாக சொல்லப்போனால், நமது சுதந்திரம் மற்றவர்களின் சுதந்திரத்தைப் பறிக்காத வரையே சுதந்திரம். பறித்து விட்டால் குற்றம் எனவும், நமக்கு இருக்கும் உரிமை அடுத்தவருக்கு இல்லை என எப்போது எண்ணுகிறோமோ, அவ்விடமே பிரச்சினையின் ஆரம்பம் என்றும் சொல்லுவேன்.
எனவே, சுதந்திரம் என்பது ஒரு நாட்டிற்கும், அந்நாட்டு மக்களுக்கும் கிடைத்த ஒரு தனிப்பட்ட அசைக்க முடியாத மாபெரும் அங்கீகாரம். இப்படிப்பட்ட மாபெரும் அங்கீகார சுதந்திரத்தைக் கொண்டாடுவதற்கு இருக்க வேண்டிய ஒரே தகுதி சுதந்திரத்தைக் கொண்டாடுபவர்கள் சுதந்திரமாக இருந்து கொண்டாடுவதுதான்.
ஆனால், நாட்டில் இன்று சுதந்திர தின கொண்டாட்டங்களின் கூத்துகள் என்ன?
அ) சுதந்திர தின விழாவிற்கு சுமார் ஒரு மாதங்களுக்கு முன்பே நாடு முழுமைக்கும் பாதுகாப்பு ஏற்பாடுகள் பலப்படுத்தப்படுகின்றன…
ஆ) சுதந்திர தினத்தை எப்படி கொண்டாடுவது என்பதற்கான ஒத்திகை அணி வகுப்புகள் நடத்திப் பார்ப்பது கொடுமையிலும் கொடுமை!
இ) சுதந்திரத்தைக் கொண்டாடும் நாட்டின் தலைவர்கள் ஆற்றும் சுதந்திர தின விழாப் பேருரைக்குக் குண்டு துளைக்காத கண்ணாடி பாதுகாப்பு!
ஈ) சுதந்திர கொண்டாட்டம் நடைபெறும் இடத்தைச் சுற்றி வளைத்து வானில் இருந்து கண்காணிக்க சிறப்பு வானவூர்தி ஏற்பாடுகள். மற்ற வானூர்திகளுக்குத் தடை!
உ) அந்தப்படை, இந்தப்படை, ஆயுதப்படை என ஆயிரக்கணக்கான பாதுகாப்பு படையைச் சேர்ந்த வாகனங்கள் மற்றும் வீரர்களின் பாதுகாப்புகள்!
இவைகள் எல்லாம் வெளியில் தெரியும் பாதுகாப்பு ஏற்பாடுகளே! இவைகள் இல்லாமல் உள்ளுக்குள் எத்தனையோ மடங்கு பல அடுக்கு பாதுகாப்பு ஏற்பாடுகள்!?
சுதந்திரத்தின் எழுபதாம் ஆண்டு சுதந்திர விழாவைக்கூட, இப்படி கொஞ்சம் கூட சுதந்திரம் இல்லாமல் பலத்த பாதுகாப்புக்கு இடையில் கொண்டாடத்தான் வேண்டுமா? இதற்காகவா நம் முன்னோர்கள் பல்லாண்டுகள் போராடி சுதந்திரம் பெற்றுத் தந்தார்கள்?
இப்படி கொண்டாடுவது உண்மையிலேயே சுதந்திர தின கொண்டாட்டம்தானா? என்ற கேள்வி நாட்டின் மீது அக்கறை உள்ள நம்மைப் போன்ற ஒவ்வொரு குடிமகனின் மனதிலும் எழும் நியாயமான கேள்வியே என்றாலும், இதனை யாரிடம் போய் கேட்பது?
அப்படிக் கேட்டால் நாட்டின் துரோகி என முத்திரைக் குத்தி விடுவார்களோ என்ற (சு)தந்திர அச்சம் வேறு.
தலைவர்களுக்குத்தான் இவ்வளவு பாதுகாப்பு ஏற்பாடுகள் என்றால், நிதிபதிகளுக்கும் ஒன்றும் குறைச்சல் இல்லை. நீதியைச் சொல்பவர்களுக்கு கூட, ஏகே 47 பாதுகாப்பு தேவைப்படுகிறது என்றால், அடிப்படையிலேயே நீதி கெட்டுக் கிடக்கிறது என்றுதானே அர்த்தம்??
மொத்தத்தில், இதன் மூலம் தெரிய வருவதெல்லாம், சுதந்திர தின விழா கொண்டாடும் தகுதியுள்ளவர்கள் என நாம் கருதிக் கொண்டிருக்கும் எவரிடமும் முதலில் சுதந்திரமில்லை என்பதே. சுதந்திரம் இல்லாத ஒருவர் அந்தச் சுதந்திரத்தைக் கொண்டாடுவதற்கு என்ன அடிப்படை தகுதியிருக்கிறது?
பல கோடிகள் செலவு செய்து இதைக் கொண்டாடுவதால் யாருக்கு என்ன பயன் இருக்கிறது என்பதைப் பட்டியல் போட முடியுமா?
எல்லாம் சம்பிரதாயத்திற்காக நடக்கிறதே ஒழிய, மற்றபடி யாருடைய சந்தோசத்திற்காகவும் அல்லவே அல்ல என்பதைவிட, நல்லபடியாக கொண்டாடி முடிப்போமா? என்ற அச்சமே மேலோங்கியிருக்கிறது. இதற்குத்தானே இவ்வளவு பாதுகாப்புகள், கெடுபிடிகள்.
உண்மையில், வழக்கமாக இருக்கும் கெடுபிடிகள்கூட சுதந்திர தினத்தன்று குறைக்கப்பட வேண்டியதுதானே நியாயம்?.
இச்சுதந்திர நாட்டில், சுதந்திர தினத்தைக் கூட சுதந்திரமாக கொண்டாட முடியாமல், போனதற்கு அடிப்படைக் காரணமே, அவர்களிடத்தில் உண்மை இல்லாததுதான். உண்மை இல்லாதவர்கள் பாதுகாப்பிலும், அச்சத்தின் உச்சத்திலும் தானே இருக்க வேண்டும்..?
எனவே, உண்மை ஒன்றே, உண்மையான சுதந்திரமும், பாதுகாப்பும் ஆகும். இதை விடச் சிறந்த பாதுகாப்பு உலகிலேயே வேறெதுவும் கிடையாது.
இந்த வகையில் பார்த்தால் ஒரு நாள் அல்ல; இரு நாட்கள் அல்ல; வருடத்தின் 365 நாட்களும் சுதந்திரத்தைக் கொண்டாடுபவர்கள் நாட்டின் மன்னர்களாகிய நாமே!
சுதந்திரம் என்ற தமிழ் வார்த்தைக்கு ஆங்கிலத்தில் இன்டிபென்டண்ட் மற்றும் ஃபீரிடம் என்று இரண்டு பெயர்களும், அர்த்தங்களும் உண்டு.
இன்டிபென்டண்ட் என்றால், “யாரையும் சார்ந்திராமல், யாருடைய பாதுகாப்பிலும் இல்லாமல் சுயமாக தன்னை மட்டுமே நம்பியிருப்பதாகும்”.
ஃபீரிடம் என்றால், நான் ஏற்கனவே சொன்னது போல “எவ்வளவுக்கு எவ்வளவு சுதந்திரமாக இருக்க முடியுமோ அவ்வளவுக்கு அவ்வளவு மிகவும் சுதந்திரமாக இருக்கும் அதே சமயம், உங்களின் ஒட்டு மொத்த சுதந்திரம் அடுத்தவரின் சுதந்திரத்தைப் பறித்து விடாமல் பார்த்துக் கொள்வதாகும்”.
எனவே, நாம் யாராக இருந்தாலும், எப்பொறுப்பில் இருந்தாலும் இந்த இரண்டு சுதந்திரத்துக்கான பொருளையும் வாழ்க்கையில் கடைப்பிடிப்பவர்களே, உண்மையான சுதந்திரத்தை உண்மையாக கொண்டாட முடியும். அப்படி இல்லாதவர்கள் கொண்டாடும் சுதந்திரம் போலியான சுதந்திரத்தைப் போலியாக கொண்டாடுவதே ஆகும்.
எதிர் காலங்களில் இவ்விரண்டு சுதந்திரத்தில் எந்தச் சுதந்திரத்தை நாம் கொண்டாட வேண்டும் என்பது சுதந்திரத்தைக் கொண்டாட நினைப்பவர்களின் கடமையில்தான் இருக்கிறது.
சுதந்திரத்தின் சூத்திரத்தோடும், உண்மையின் பாதுகாப்போடும் சுதந்திரத்தைக் சூசக (சு)தந்திரமாக கொண்டாடும் இந்திய குடிமக்களாகிய உங்கள் அனைவருக்கும் எனது சுதந்திர தின நல்வாழ்த்துக்கள்.
மத்திய சட்டம் மற்றும் நீதியமைச்சகத்தின் நிதியுதவியோடு வெளியிடப்பட்டுள்ள ‘‘கடமையைச் செய்! பலன் கிடைக்கும்’’ என்ற  நூலிலிருந்து…
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Tuesday, August 9, 2016

பொய்யர்களே உணர்ந்தால் சரி!


‘‘மக்களின் நன்மைக்காக நீதிமன்றங்கள் அமைக்கப்பட்டி ருக்கின்றன என்று நினைப்பது தவறு. தங்கள் ஆட்சியை நிரந்தரமாக்கி கொள்ள விரும்பு பவர்கள், இந்த நீதிமன்றங்கள் மூலம் அதைச் செய்து வருகின்றனர்’’ என்று இந்தியத் தன்னாட்சி நூலில் சத்தியவான் காந்தி கூறியுள்ளார்.
சத்தியவான் காந்தியின் இந்நாலு வரிச் செய்தியை விவரித்து சொல்ல வேண்டுமென்றால், எத்தனை எத்தனையோ நூல்களை எழுத வேண்டியிருக்கும்.
இக்கருத்தை மையப்படுத்தும் சில கருத்துக்களை நம் நீதியைத்தேடி… உள்ளிட்ட நூல்களில் சொல்லியுள்ளேன்.
இதன் அடிப்படையில்தான் எனது சட்ட ஆராய்ச்சி மற்றும் விழிப்பறிவுணர்வூட்டும் கடமையும் நடந்து வருகிறது. உண்மையில், இது ஓர் உலக அளவில் செயல்படுத்த வேண்டிய நற்சிந்தனை.
பொய்யர்களின் தொழில் ஒழிந்தால், எல்லாம் சரியாக இருக்கமென்ற சத்தியவான் காந்தியின் புரிதல் தற்போது, பாக்கிஸ்தான் பயங்கரவாதிகளுக்கு வந்து விட்டது போலும்.
ஆகையால், பொய்யர்களை குறிவைத்து, தங்களின் பயங்கரவாதச் செயலை செய்து, கொத்து கொத்தாகவும், பிரபலப் பொய்யர்களை படுகொலை செய்து வருகின்றனர்.

இக்கொடுமை நம் பொய்யர்களுக்கு வருவதற்கு முன்னர், அப்பொய்யர்களே உணர்ந்தால் சரி!
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Thursday, August 4, 2016

மனுவை வரைவதில் வல்லமை பெறுவதெப்படி?



நீதியைத்தேடி… வாசகர்கள் சிலர், தாங்கள் எழுதும் மனுக்கள் எந்த அளவிற்கு இருக்கிறது என்பதை சோதிப்பதற்காக எனக்கு அனுப்புகிறார்கள். கருத்து கேட்கிறார்கள்.
‘‘சித்திரமும் கைப்பழக்கம்; செந்தமிழும் நாப்பழக்கம்’’ என்பதுபோல, மனுவும் எழுத எழுதத்தான் பழக்கமாகும் என்பதை விளங்கிக் கொள்ளாமல், பதினைந்தாண்டு காலமாக பல்வேறு விதங்களில் எழுதிக்கொண்டிருக்கும் என்னிடம் கேட்டால், எப்படி குறை சொல்லாமல் இருப்பேன்?!
நமது எழுத்திலுள்ள குற்றங்குறையை கண்டுபிடித்துச் சொல்ல வேண்டும் என்பது உங்களது பயமாகவோ அல்லது பக்குவமாகவோ கூட இருக்கலாம். ஆனாலும், உங்களது தன்னம்பிக்கையில் தலையிடக்கூடாது என்பதற்காகவே சொல்வதில்லை.
மனுவை அனுப்பிய பின்னர் ஒருசிலர் இதனை சேர்க்க மறந்து விட்டேன் என்று அவர்களாகவே சொல்லுவார்கள்.
உண்மையில், இப்படித்தான் கொஞ்சங்கொஞ்சமாக மனு வரைவதில் வல்லவர்கள் ஆகிட முடியும். இதனை ஏதோ உங்களை சமாதானம் செய்வதற்காக சொல்லவில்லை.
நானும், இப்படித்தான் வரைவதில் வல்லமைப் பெற்றேன் என்பதை நீதியைத்தேடி… குற்ற விசாரணைகள் மற்றும் மநு வரையுங்கலை! ஆகிய இரண்டு நூல்களிலும் உள்ள ம(னு, நு)க்களை ஒப்பிட்டுப் பார்ப்பதன் மூலம் அறியலாம். இதனை மநு வரையுங்கலை! நூலிலும் ஒப்பிட்டுச் சொல்லியுள்ளேன்.
இம்மநு வரையுங்கலை! நூலைப் படித்ததாக சொல்பவர்களுங்கூட, இப்படி கேட்கத்தான் செய்கிறார்கள் என்பது, அவர்கள் நூலின் கருத்துக்களை எந்த அளவிற்கு புரிந்து கொண்டுள்ளார்கள் என்பதை எனக்கு தெளிவுபடுத்தி விடுகிறது.
ஆகையால், இதற்குமேல் நான் அவ்வாசகர்களை தெளிவுபடுத்த மேற்கொள்ளும் எம்முயற்சியும் பயனற்றதே!
ஆனால், பெ(ரு, று)ங்கூலிக்கு மாரடிக்கும் பொய்யர்கள் எழுதும் மனுக்களைவிட, நீங்கள் பொறுப்புணர்வோடு எழுதும் மனுக்கள், உங்களது அனுபவத்திற்கு தக்கவாறு சரியாகத்தான் இருக்கும் என்ற ஒன்றை மட்டும் நிச்சயம் சொல்லுவேன்.
இதில், உங்களுக்குச் சந்தேகம் இருந்தால், பொய்யர்களின் முகநூல் பக்கங்களுக்குச் சென்று அவர்களின் பதிவுகளைப் படித்துப் பாருங்கள். நாம் எவ்வளவோ பரவாயில்லை என்று உங்களுக்கு நீங்களே பெருமைப்பட்டுக் கொள்வீர்கள்!
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

Wednesday, August 3, 2016

கிராம முன்னேற்றமே, நாட்டின் முன்னேற்றம்!


சத்தியவான் காந்தியவர்கள், நாட்டின் முதுகெலும்பே கிராமங்கள்தான் என்றும், கிராம முன்னேற்றமே, நாட்டின் முன்னேற்றம் என்றும் கூறியுள்ளார்.
நமது நாட்டுப் பணக்காரர்கள் அநேகருக்கு அயோக்கியத்தனமும், ஆணவமும், நாணயக் குறைவும், நாட்டின் நலனுக்கு பொறுப்பற்ற தன்மையாய் நடந்து கொள்ளவும் காரணமே வக்கீல்கள்தாம்.
விவசாயிகள் பெரிதும் கடன்காரர்களாக இருப்பதற்கும் வக்கீல்களே காரணமாவார்கள் என்று பகுத்தறிவுப் பெரியார் குறிப்பிட்டுள்ளார். 
ஆமாம், கிராமத்தின் முன்னேற்றம் கெட்டதற்குகூட, பொய்யர்களே காரணமாவார்கள்!
கிராம நிர்வாக ஊழியரிடம் தீர்க்க வேண்டிய சாதாரண பிரச்சினைகளை கூட, பொய்யர்கள் தங்களின் நாறிய பிழைப்புக்காக உச்சநீதிமன்ற நிதிபதிகள் வரை கொண்டுச் சென்று, வறிய கிராமத்தவர்களின் வயிற்றில் அடித்து விட்டனர்.
இதனை தடுக்கவேண்டுமென்ற எண்ணத்தோடு மத்திய அரசால் கொண்டுவரப்பட்ட கிராம நீதிமன்றங்கள் சட்டமும் பொய்யர்களின் புறம்போக்குத்தனமான நடவடிக்கைகளில் சிக்கிக்கொண்டது.
இதுபற்றி, நம் நீதியைத்தேடி… நூல் வெளியீட்டு விழா தொடர்பான இப்பத்திரிகை செய்தியிலும் சொல்லப்பட்டுள்ளது.

எனவே, இதனையெல்லாம் களைந்து, கிராமங்களை மீட்டெடுக்க வேண்டிய கடமை, கிராமப்புற மேம்பாட்டில் கவனஞ் செலுத்தும் ஒவ்வொருவரின் கட்டுப்பாட்டிலுந்தான் இருக்கிறது.
இதனை செயல்படுத்துவதற்கு ஏற்ப, கிராம நிர்வாக ஊழியர்கள் மற்றும் குடிமக்கள் நடைமுறை நூலை, நமது பாணியிலான விளக்கத்தோடு கொண்டு வரலாமா என்ற எண்ணத்தில், அதற்கான வேலைகள் நடந்து கொண்டிருக்கின்றன.
இதற்கு ஆர்வத்தோடு சிலர், தங்களால் இயன்ற  ஒத்துழைப்பை வழங்கி வருகின்றனர்.
வழக்கம் போலவே வாசகர்களின் பங்களிப்புத் தொகையோடு தான் இந்நூலை வெளிக்கொண்டு வரமுடியும் என்ற நிலையிருக்கிறது.
எது எப்படி இருப்பினும் இந்நூலின் பணி முடியும் வரை அவ்வப்போது, கிராம நிர்வாகத்தின் முக்கிய சங்கதிகள் குறித்து இயன்றவரை சொல்லலாம் என எண்ணுகிறேன்.
இதன் முதற்கட்டமாக, அரசின் சார்பாக ஒவ்வொரு கிராமத்திலும் இருக்க வேண்டிய ஊழியர்கள் பற்றி சொல்கிறேன்.
(1) கிராம நிர்வாக அலுவலர்
(2) கிராமக் காவலர்
(3) கிராமப் பணியாளர்
(4) பாசனக் காவலர்
(1) கிராம நிர்வாக அலுவலர்
கிராம நிர்வாக அலுவலர் கிராமத்தில் அரசாங்கத்தின் பிரதிநிதியாயிருக்கிறார். அவர் அரசாங்க நேரப் பணியாளர் ஆவார். அந்தக கிராமத்தில் நில வருவாய் மற்றும் இதர வருமானத்தை வசூல் செய்கிறவராக இருப்பதோடு கூட இந்த நடைமுறை நூலின் 5 ஆம் அத்தியாயத்தில் சொல்லப்பட்டிருக்கும் வெவ்வேறு வகையான அலுவல்களைச் செய்ய வேண்டியவராகவும் இருக்கிறார்.
ஒரு கிராம நிர்வாக அலுவலரால் நிர்வகிக்க முடியாத மிகுந்த வருமானம் அல்லது அதிகப்படியான அலுவல்கள் உடைய கிராமங்களுக்காக கூடுதல் கிராம நிர்வாக அலுவலர்கள் நியமிக்கப்படுகிறார்கள். கிராமக் காவலர், கிராமப் பணியாளர், பாசனக் காவலர் ஆகியோர் பகுதிநேர பணியாளர்கள் ஆவார்கள்.
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

நூல்களின் முகப்பு

நியாயந்தான் சட்டம்

Translate

Follow by Email

அடிப்படை சட்டங்கள்

  • 1. இந்திய சாசனம் 1950
  • 2. நீதிமன்ற சாசனம் 1872
  • 3. இந்திய தண்டனை சட்டம் 1860
  • 4. குற்ற விசாரணை முறை விதிகள் 1973
  • 5. உரிமையியல் விசாரணை முறை விதிகள் 1908

நம் நூல்களைப் பற்றி

நீதியைத்தேடி.... நீங்களும் நீதிமன்றத்தில் வாதாடலாம் வரிசையில்...
1 குற்ற விசாரணைகள்
2 பிணை (ஜாமீன்) எடுப்பது
எப்படி?
3 சட்ட அறிவுக்களஞ்சியம்
4 சட்டங்கள் உங்கள் பாக்கெட்டில்
5 சாட்சியங்களைச் சேகரிப்பது
எப்படி?
6 கடமையைச் செய்!
பலன் கிடைக்கும்
7 மநு வரையுங்கலை!Recent Posts Widget

இந்நூல்கள் அனைத்தும் உங்களின் சட்ட விழிப்பறிவுணர்வுக்காக
மத்திய சட்டம் மற்றும் நீதியமைச்சகத்தின் நிதியுதவியோடு
தமிழ்நாடு மற்றும் புதுச்சேரியில் உள்ள நான்காயிரத்துக்கும் மேற்பட்ட பொது நூலகங்கள், மத்திய சிறைச்சாலைகள் மற்றும் சென்னை உயர்நீதிமன்றம் உள்ளிட்ட நீதிமன்றங்களுக்கு வழங்கப்பட்டுள்ளன.

சொந்தமாக தேவைப்படுவோர், உ(ய)ரிய நன்கொடையைச் செலுத்திப் பெற்றுக் கொள்ளலாம். தொடர்பு உலாப்பேசி எண்கள் 09842909190 மற்றும் 09842399880 ஆகும்.

இப்படி, நன்கொடை செலுத்தி வாங்கிய நூல்களால் பயனில்லை என்று கருதும் பட்சத்தில், அப்படியே திருப்பி அனுப்பிவிட்டு, கொரியர் செலவுபோக மீதிப் பணத்தைப் பெற்றுக் கொள்ளலாம்.

எல்லாப் பதிகளும்!

பயின்றோர் (20-08-16)