நீ வாழ... நீயே வாதாடு... வரவேற்பு வாழ்த்து!

No law, no life. Know law, know life! என்ற நமது அடிப்படைக் கொள்கை தத்துவத்திற்கு இணங்க சட்ட விழிப்பறிவுணர்வின் (அ)வசியத்தை உணர்ந்து, ‘‘நீதியைத்தேடி... சட்டப் பல்கலைக் கழகத்திற்கு’’ வருகை தந்துள்ள உங்களை வருக என வரவேற்று, உங்களுக்கான சட்ட விழிப்பறிவுணர்வைப் பெற்று பயனைப் பெறுக என வாழ்த்துகிறோம்!
முக்கிய அறிவிப்பு : இந்த இணையப்பக்கத்தை புதுப்பிக்கும் பணி நடந்துக் கொண்டிருப்பதால், சில பதிவுகள் அல்லது இணைப்புக்கள் கிடைக்காமல் போகலாம்!

Friday, December 2, 2016

உலக ஊழலில் கொழுக்கும் ஸ்விஸ் வங்கிகள் - பாகம் 1


முன்னுரை: சுவிஸ் வங்கியில் உள்ள இந்தியர்களின் கறுப்புப் பணத்தை, இந்தியாவிற்கு கொண்டு வருவதில் என்ன சட்ட சிக்கல் இருக்கிறது என வாசகர் ஒருவர் மின்னஞ்சலில் கேள்வி எழுப்பி இருந்தார். 

இதுகுறித்து, நீண்ட நாட்களாகவே நானும் எழுத வேண்டுமென நினைத்து இருந்தேன். ஒரு விடயத்தில் என்னைவிட, ஒருவர் புலமை பெற்றவர் என நான் கண்டறிந்தால், அதுபற்றி அவர்களையே எழுதச் சொல்லி விடுவேன். 

இந்த வகையில், சுவிஸ் வங்கியில் உள்ள நம் கறுப்புப்பணத்தை மீட்க முடியாததற்கான காரணத்தை கட்டுரையாக வடித்து தருமாறு நண்பரை கேட்டிருந்தேன். ஆனால், அவரோ மிகமிக சுருக்கமாக ஒரு சிறு புத்தகமாகவே தொகுக்கும் அளவிற்கு எழுதி விட்டார். 

இவ்வளவு செய்தியும் தேவையா... எதையெல்லாம் குறைக்க முடியும் என ஒரு மின்னஞ்சல் குழுவில் பகிர்ந்து கருத்துக் கேட்ட போது, எதையுமே குறைக்க முடியவில்லை. மாறாக, கொஞ்சங் கூட்டவே முடிந்தது. 

ஆமாம், சரியான சட்ட சிக்கலை மட்டும் சொல்ல வேண்டு மென்றால், நீங்கள் இதுவரை படித்த அளவிற்கு கூட செய்தி கிடையாது. ஆனால், இது உங்களின் புரிதலுக்கு போதுமானதாக இருக்காது. 

இல்லையில்லை; சுவிஸ் வங்கியில் உள்ள கறுப்புப்பணத்தைப் பற்றி யாருக்குமே புரிதல் இல்லை என்று சொல்வதுகூட, மிகையல்ல என்பது இக்கட்டுரையின் இறுதித்தொடரை முடிக்கும்போது உணர்வீர்கள். 

ஆமாம், இத்தொடரின் முடிவில், சிறு நூலாகவே வெளியிடலாம் என்ற எண்ணம் எனக்கு ஏற்பட்டுள்ளது. 

1. சுவிஸ் வங்கியைப் பற்றி, நமக்கு பத்துப் பதினைந்து ஆண்டுகளாகத்தான் தெரியும். ஆகையால், சுமார் முன்னூறு ஆண்டுகளுக்கு முன் அவ்வங்கி தோன்றிய வரலாறு முதல் அவ்வங்கியின் இன்றைய நிலைப்பாடு வரை...

2. சுவிஸ் வங்கி இந்தியக் கறுப்புப்பணத்துக்கு மட்டுந்தான் புகலிடமா அல்லது ஒட்டு மொத்த உலக கறுப்புப் பணத்துக்குமா? 

3. சுவிஸ் வங்கி இந்தியாவுக்கு மட்டுந்தான் தண்ணி காட்டுகிறதா அல்லது உலகத்துக்கே தண்ணி காட்டுகிறதா? 

4. சுவிஸ் வங்கியால், அந்நாட்டுக்கும் மற்ற நாடுகளுக்கும் நடந்த நன்மை, தீமைகள் என்னென்ன? 

என்பன உள்பட பல்வேறு தகவல்களை தொடராகப் படிக்கப் போகிறீர்கள். இதில் உங்களுக்கு எழும் நியாயமான கேள்விகளை பின்னூட்டத்தில் எழுப்பி, பதிலைப் பெறலாம். 

இந்த அருமையான ஆக்கத்தை தந்த, அந்நண்பருக்கு நன்றி! 


ஒரு ஆப்பிரிக்க தேசம். பல ஆண்டுகளாகக் கடும் வறுமையிலும், அடக்கு முறைகளாலும், நெருக்கடிகளாலும், அரசியல் நிச்சயமின்மையாலும், பற்பல வன்முறை மற்றும் பெருகும் குற்றங்களாலும் பெரும் பாதிப்படைந்து, மக்களெல்லாம் மிகவும் நொந்து தளர்ந்து போன நிலையில் ஒரு ஆட்சி மாற்றம் ஏற்பட்டது. புதிய அரசில் முக்கிய அதிகாரத்துக்கு வந்த ஒரு அரசியல்வாதி அந்த மாற்றத்தில் ஒரு முக்கிய பங்காற்றினான். 

தன்னுடைய நீண்ட கால அரசியல் வாழ்க்கையில் உண்மைக்காகவும், மிகக் கண்டிப்பான நேர்மைக்காகவும் மக்களிடம் மிகவும் நல்ல பெயரும் செல்வாக்கும் பெற்ற அவன், இனி ஒரு புதிய விடிதல் அத்தேசத்தில் அவனால்தான் வரும் எனும், நம்பிக்கையையும் மக்களிடையே பெற்றிருந்தான்.

அவன் சார்ந்த கட்சி ஆட்சிக்கு வருமுன் செய்த பிரச்சாரங்களில், அதற்குமுன் ஆண்ட அரசியல் பிரமுகர்களெல்லாம் எந்த அளவுக்கு ஊழல் செய்தார்கள், எந்த அளவுக்கு மக்களை சுரண்டியும், கோடிகோடிக் கணக்கில் கொள்ளையடித்தும் அந்தப் பணத்தையெல்லாம் ஸ்விஸ் வங்கிகளில் எவ்வாறு பதுக்கிக் கொண்டார்கள் என்பதையெல்லாம் விலாவரியாகப் பட்டியலிட்டு மக்கள் முன் காட்டினான். 

தாங்கள் ஆட்சிக்கு வந்தவுடன் நிச்சயமாக அந்தத் தேசத் துரோகிகளின் முகத்திரையைக் கிழித்து அவர்கள் பதுக்கிய பணத்தை மீட்டுக் கொண்டு வருவோம் என்று சூளுரைத்து, உறுதியளித்திருந்தான். 

சொன்னது போலவே ஆட்சிக்கு வந்ததும் இரண்டு மாதங்களுக்குள் முதல் காரியமாக ஒரு தீர்மானமான முடிவுடன் ஸ்விட்ஸர்லாந்திற்குப் பயணமானான். தன் கைப்புத்தகத்தைப் பார்த்து, அதில் குறித்து வைத்திருந்த ஒரு வங்கிக்கு நேராகச் சென்றான். பல அடுக்குகளைத் தாண்டி இறுதியில் அந்த வங்கியின் பிரதான நிர்வாகியான ‘மேனேஜரை’த் தனிமையில் சந்தித்தான். தன்னை இன்னாரென்று அறிமுகப் படுத்திக் கொண்டு, தன் தேசத்தைப் பற்றியும் ஊழல்களைப் பற்றியும் நீண்டு விவரமாக எடுத்துரைத்தான். 

அதில் சம்பந்தப் பட்டவர்களில் பலர் அந்த வங்கியில்தான் கணக்கு வைத்திருப்பதாகத் தனக்கு மிகவும் நம்பிக்கையான தொடர்பு களின் மூலம் தெரிந்து கொண்டிருப்பதாகவும், அத்தகைய கணக்குகளின் முழு விவரங்களைத் தனக்கு அளித்து, சட்டத்தின் முன் அவர்களை நிறுத்தத் தனக்கு உதவ வேண்டும் எனவும் கேட்டுக் கொண்டான்.

இவன் சொன்னது அனைத்தையும் மிகவும் பொறுமையுடன் கேட்டுக் கொண்டிருந்த அந்த ‘மேனேஜர்’ இவன் பேசி முடித்தவுடன் கொஞ்சம் அமைதியாக இருந்தான். பின்பு, ‘மன்னிக்கவும், நீங்கள் சொன்னபடி உங்கள் தேசத்து பிரமுகர்கள் ஒருவேளை எங்கள் வங்கியில் கணக்கு வைத்திருக்கலாம், அல்லது அவ்வாறான கணக்குகள் எதுவும் இல்லாமலும் இருக்கலாம், ஆனாலும், எங்கள் நாட்டின் சட்டத்தின்படி, இங்கு வங்கிகளில் கணக்கு வைத்திருப்பவர்களின் விவரங்களை யாருக்கும் தர இயலாது’ என்று பணிவாகவும் உறுதியாகவும் கூறினான். 

ஆப்பிரிக்க அரசியல்வாதி இதை ஒரு வகையில் எதிர்பார்த்திருந்தான். ஆகவே கொஞ்சமும் தளரவில்லை. அந்த ஊழல்வாதிகளைக் குறித்ததான மேலும் பல சங்கதிகளைக் கூறலானான். ‘அவர்கள் கணக்கு வைத்திருப்பதாகத் தனக்கு வந்த தகவல் மிகவும் நம்பகமானதுதான், அவர்கள் சட்டத்தின் முன் மாட்டுவது நிச்சயம்; அவ்வாறு மாட்டினால் அந்த ஊழல்களின் விவரங்களெல்லாம் பகிரங்கமாகும். கூடவே அவர்கள் கணக்கு வைத்திருந்த வங்கியின் பெயரும் வெளியில் வந்து நாறிப்போகும். ஆகவே வங்கியின் உண்மையான நலனுக்காகவாவது விவரங்களைத் தரவேண்டியது அவசியம்’ என்று நிர்ப்பந்தித்துக் கோரினான். 

பொறுமையுடன் அனைத்தையும் கேட்டுக் கொண்ட அந்த மேனேஜர், மீண்டும் பணிவாகத் தான் முன்பு சொன்னதையே திரும்பவும் சொன்னான். 

இதற்கும் தளராத அரசியல்வாதி தன்னுடைய தேசத்தில் நிலவும், மக்களின் ஏழ்மை, வறட்சி முதலான அல்லற்பாடுகள் குறித்தும் அவர்களின் துயரமான, அவலமான நிலைகளைப் பற்றியும், அவர்கள் எந்த அளவுக்குப் பலவிதமான ஊழல்களால் பாதிக்கப்பட்டு வதங்கிப் போயிருக்கிறார்கள் என்றெல்லாம் உருக்கமாக விவரித்து, அந்த ஊழல்காரர்கள் இந்தப் பதுக்கிய பணத்தையெல்லாம் உபயோகித்து மீண்டும் தங்கள் தேசத்தில் குழப்பங்களை ஏற்படுத்தி எவ்வளவு நெருக்கடிகளைக் கொடுப்பார்கள் என்றும், அந்த வங்கி கொடுக்கும் விவரங்கள் எந்த அளவுக்குத் தன் தேசத்தின் எதிர்காலத்துக்கு அவசியம் என்றும் எடுத்துச்சொல்லி, இது வங்கிகளின் மனசாட்சிக்கான சோதனை என்பதாகக் கருத்தில் கொண்டு, விவரங்களைத் தந்தே தீரவேண்டும் என மிகவும் மன்றாடிக் கேட்டுக் கொண்டான். 

தனிப்பட்ட முறையிலாவது மனசாட்சியை விசாரித்து அதன்படி விவரங்கள் கொடுக்கவேண்டும் என்றும் அந்த மேனேஜரின் நெஞ்சுருகும்படி கெஞ்சினான். தன் பணிவிலும் இறுக்கத்திலும் இம்மிகூட மாறாத அந்த மேனேஜரோ அத்தனையும் பொறுமையாகவும், சிரத்தையாகவும் கேட்ட பின்பு, மன்னிப்பு மட்டும் கேட்டுக் கொண்டு, கொஞ்சமும் அசராமல், தான் முன்பு பாடிய அதே பாட்டையே மீண்டும் பாடினான்.

கோபமான அரசியல்வாதி, தாங்கள் எந்த அளவுக்கு மக்கள் நலனுக்குப் பாடுபட்டோம், ஆட்சி மாற்றத்திற்காக உலகில் எத்தனை அமைப்புகள் தங்களுக்கு உதவிகள் புரிந்தன என்றெல்லாம் அடுக்கடுக்காக எடுத்துக்கூறி, விவரங்களைத் தரவில்லையெனில் உலக அரங்கில் இதை ஒரு முக்கிய கோரிக்கை அம்சமாக எடுத்துச் சென்று அந்த வங்கியின் பெயரைப் பல விதங்களிலும் கெடுத்து அந்த வங்கியையே முடக்கும் நடவடிக்கை எடுக்க வேண்டிவரும், ‘நாங்கள் சொன்னதை நிச்சயம் செய்வோம்’ என்று மிகக் கடுமையாக  எச்சரித்தான். பணிவும் இறுக்கமும் சற்றும் மாறாத அந்த மேனேஜர், ‘ரொம்ப நல்லது அப்படியே செய்யுங்கள், ஆனால் விவரங்கள் கொடுக்க இயலாது’ என்றான். 

அரசியல்வாதி ஆவேசமானான். எதிர்பாராத வகையில் சட்டென்று தன் கைத்துப்பாக்கியை எடுத்து மேனேஜரின் நெற்றிப் பொட்டில் அழுத்தினான். ‘இதோ பார், விவரங்களைத் தரமறுத்தால் இந்தக் கணமே உன் விவரங்களுடன் நீயும் சொர்க்கத்துக்கோ அல்லது நரகத்துக்கோ பயணப்பட வேண்டியதுதான். இந்த நொடியே உன்னைக் கொன்று போட்டாலும் என்னால் என் தேசத்திற்கு பத்திரமாகப் போய்ச்சேர முடியும்; உங்கள் சட்டங்களாலோ, எங்கள் சட்டங்களாலோ என்னை எதுவும் செய்ய முடியாது என்பது உனக்கே தெரியும். வாழ்வா, சாவா, ஒரு நொடியில் முடிவெடு’ என்று ஆழ்ந்த உறுதியான குரலில் அதேசமயம் மிகக் கடுமையாக மிரட்டினான்.

அவன் மிரட்டலில் வெளிப்பட்ட சந்தேகமில்லாத உறுதியை நன்கு புரிந்துகொண்ட மேனேஜரின் கை கால்களெல்லாம் பீதியில் நடுங்கலாயின. அந்தக் குளிரிலும், வியர்வையில் தொப்பலாக நனைந்து போனான். நடுங்கும் குரலில் மெதுவாகச் சொன்னான், ‘நான் எங்கள் நாட்டின் சட்டப்படிதான் வேலை செய்கிறேன். என்னைக் கொல்வதென்றால் கொன்றுகொள், ஆனால் விவரங்கள் தர இயலாது’.

அரசியல்வாதி பின்வாங்கினான். அமைதியாகத் தன் இருக்கையில் நன்கு சாய்ந்து அமர்ந்து கொண்டான். முகத்தில் ஒருவகையான திருப்தி ரேகையின் சாயல் இருந்தது. துப்பாக்கியை பிரீஃப்கேஸில் வைத்துவிட்டுப் பேனாவை எடுத்துக் கொண்டான். எதிரில் இன்னும் பயத்திலிருந்தும் நடுக்கத்திலிருந்தும் விடுபடாத மேனேஜரைப் பார்த்தான். ‘இப்படிப்பட்ட ஒரு வங்கிதான் எனக்குத் தேவை’ என்று சொல்லி, ‘உங்கள் வங்கியில் நான் கணக்கு ஆரம்பிக்க வேண்டுமென்றால் என்னென்ன செய்ய வேண்டும்?’ என்று வினவலானான். 
    
ஒரு பிரபல ஆங்கில நாவலாசிரியரின் சுமார் நாற்பது ஐம்பது ஆண்டுகளுக்கு முன்னால் வெளியான கதைத் தொகுப்பில் படித்த ஒரு சிறுகதையின் சுருக்கம்தான் நாம் மேலே கண்டது. கதை வேண்டுமானால் கற்பனையாக இருக்கலாம். 

ஆனால் விவரங்களில் எல்லாம் உண்மையில்லாமல் இல்லை.

‘ஒரு வங்கியைத் தொடங்கி நடத்துவதைவிட, ஒரு வங்கியைக் கொள்ளையடிப்பதில் அதிகப்படியான குற்றம் ஏதுமில்லை’ என ஒரு அமெரிக்கப் பிரபலம் கூறினார். 

பணத்தின் உண்மையான கதையைப் புரிந்து கொண்டால்தான் நாம் சாதாரணமாகப் புழங்கிக் கொண்டிருக்கும் வங்கிகள் சாமானிய மக்களை எவ்வாறு ஏய்த்து சட்டபூர்வமாகக் கொள்ளையடித்துக் கொண்டிருக்கின்றன என்பது புரியும். இந்நிலையில் சாதாரண வங்கிகளிலிருந்து ஸ்விஸ் வங்கிகள் அடிப்படையில் மாறுபட்டவை. 

இன்றைக்கு சுமார் முன்னூற்றைம்பது நானூறு ஆண்டுகளுக்கு முன்பும், பிரெஞ்சுப் புரட்சிக்கு சுமார் நூறு நூற்றைம்பது ஆண்டுகளுக்கு முந்தைய காலகட்டங்களில், ஐரோப்பிய அரசாங்கங்களெல்லாம் ஓயாமல் தங்களிடையே யுத்தங்கள் செய்து கொண்டு, யுத்தம் என்றாலே பரவலான கொள்ளைக்கான ராஜபாட்டைதான் எனும்படி, காலம் காலமாக அடித்துக் கொண்டு, ஒருவரை ஒருவர் கொள்ளையடித்துக் கொண்டிருந்தனர். 

இவ்வாறான யுத்தங்கள் புரிவதற்கு, தாங்கள் சம்பளம் கொடுத்து வைத்துக் கொண்டிருக்கும் ராணுவத்துக்கும் மேலாக, யுத்தங்களின் போது மட்டும் குத்தகைக்கு அமர்த்திக் கொள்ளும் ‘மெர்ஸினரிஸ்’ எனப்படும், கூலிப்படையினரை, பெரும் பணம், தங்கமெல்லாம் கொடுத்து உபயோகித்துக் கொள்வதை ஏறக்குறைய எல்லா அரசாங்கங்களும் வழக்கமாகக் கொண்டிருந்தன. முக்கியமாக இந்தப் படையினரில் பெரும்பாலோர் ஸ்விட்ஸர்லாந்து தேசத்தின் முன்னாள் ராணுவ வீரர்களாகவே இருந்தனர். 

கேள்வி எதுவும் கேட்காமல், நியாய அநியாயம் பார்க்காமல் சுட்டிக் காட்டும் இடத்திற்குச் சென்று, மூர்க்கத்தனமாகக் கொன்று குவிப்பதை வாடிக்கையாகக் கொண்டிருந்த அத்தகைய கூலிப்படையினர் தங்கள் உயிர் போவதைப் பற்றியெல்லாம் துளியும் கவலைப் படாதவர்களாக இருந்தனர். 

இதில் பெரும்பாலோர் பின்னாட்களில் பிரெஞ்சு ராணுவத்திலேயே தங்களை இணைத்துக் கொண்டு பிரெஞ்சுப் பெண்களைத் திருமணம் செய்து கொண்டு குடியும் குடித்தனமுமாக ஆனாலும் அதில் சிறுபான்மையோர், குடும்பம் குட்டி என்ற பந்தங்களெல்லாம் பெரிதாக எதுவுமில்லாமல், போர்களில் ராணுவத்தினரோடு சண்டையிடுவதைத் தவிர, சாமானிய மக்களிடம் வம்பு தும்பு வைத்துக் கொள்ளாமல், உள்ளூர் ரௌடிகளைப் போல் சில்லறைச் சண்டைகளிலெல்லாம் ஈடுபடாமல், போர்ப் பயிற்சிகள் செய்வது, நன்கு உண்பது, குடிப்பது, நன்றாக உறங்குவது, யுத்தம் என்று வந்தால் முழுத்திறமைகளுடன் கோரப்போர் புரிவது என்று, பல்வேறு தேச ராணுவங்களோடு தங்களை இணைத்துக் கொண்டு அவர்களுக்கு வேலை செய்தால் இவர்களைக் கொல்வது, இவர்களுக்கு வேலை செய்தால் அவர்களைக் கொல்வது என்று பெரிதாக தேசபக்தி, பாச விசுவாசம் எதுவுமின்றி, வெளியில் பார்ப்பதற்கு முரட்டுத்தனமாக இருந்தாலும் மனதளவில் ஞானிகளைப் போல் பற்றற்றவர்களாக இருந்தார்கள். 

பல போர்க்கால அவசர நெருக்கடியான சந்தர்ப்பங்களில், மிகுந்த சாகசங்களுடன் பொதுமக்களைப் பல்வேறு ஆபத்துகளிலிருந்தும், இடர்ப்பாடுகளிலிருந்தும் காப்பாற்றும் இவர்கள் போக்கினால் நன்றியுற்று ஆங்காங்கு பொதுமக்களும் தங்களால் இயன்ற உபசரிப்புகளை இவர்களிடம் காட்டுவார்கள். இவர்களில் பலரும் குறிப்பிட்ட குழுக்களாகவும், தனிமையிலும் இருந்தாலும் போர்க்காலங்களில் ஒன்றாகச் சேர்ந்து கொள்வார்கள். 

இவர்களில் பலரும் பல யுத்தங்களைக் கண்டு தழும்பேறி, முதிர்ந்த மனப் பக்குவமும், பரபரப்பில்லாமல் பற்பல யுக்திகளைக் கொண்டு மின்னல் வேகத்தில் செயலாற்றி வெற்றியைப் பறிக்கும் ஆழ்ந்த அனுபவங்களும் கொண்டிருந்ததாலும், போர்த்திட்ட காலங்களில் வேறு வேறு அரசாங்கங்களின் பல முக்கியஸ்தர்களுடன் நெருங்கிப் பழகும் வாய்ப்புகள் கொண்டிருந்தார்கள். அவ்வகையில் பலரின் அந்தரங்கங்களையும் வேறுபட்ட அரசியல் நிலைகளையும் தெளிவாக அறிந்து கொண்டிருந்தார்கள். 

இவ்வாறான பற்பல ரகசிய அரசியல் நடவடிக்கைகளையும், அதனால் ஏற்பட்ட விளைவுகளையும் குறித்தும்  அவர்களெல்லாம் போர்க்காலங்களில் தோளோடு தோள் நின்று போராடும் சமயங்களிலோ அல்லது ஓய்வு காலங்களில் தங்கள் தேசமான ஸ்விட்ஸர்லாந்தில் சந்தித்துக் கொள்ளும்போதோ, தங்களிடையே ஒருத்தருக்கொருத்தர் தயக்கமின்றிப் பரிமாறிக் கொள்வதன் மூலமாக, ஒரு விஷயத்தை நன்றாக உணர்ந்து கொண்டார்கள். 

இந்த அரசாங்கங்களெல்லாம் வெளிப்பார்வைக்கு நல்லவர்கள் போல் நடித்து சாமானிய மக்கள் முன்னால் போடுவதனைத்தும் வெறும் போலி வேஷம். அயோக்கியத்தனத்திலும், தகிடுதத்த போக்கிரித்தனத்திலும் ஒருத்தருக் கொருத்தர் கொஞ்சமும் குறைந்தவர்களில்லை; பச்சை பச்சையாகப் பொய் சொல்லி மக்களை ஏமாற்றுவதிலும் ஒருவருக்கொருவர் சளைத்த வர்களில்லை. வெளி தேசத்தினரும் மக்களைத்தான் கொள்ளை யடிக்கிறார்கள். 

உள்நாட்டிலும் மக்கள் நலன் என்றெல்லாம் சொல்லிக்கொண்டு மக்களைத்தான் கொள்ளையடிக்கிறார்கள் என்று திண்ணமாகப் புரிந்து கொண்டு, வெளியில் அரசாங்கங்களுக்கு மதிப்பு கொடுப்பதுபோல் பாவலா காட்டிக் கொண்டாலும் உள்ளுக்குள் அவர்களின் நிஜமான நடவடிக்கைகளைக் கண்டு அருவருத்துக் கொண்டார்கள்.

ஒவ்வொரு போரின் முடிவிலும், மேலும் புரட்சி, கலகங்களின் ஊடேயும், அரசாங்கங்கள் மாறும்போதும், அதுவரை ஏதேதோ தொழில்களில் ஈடுபட்டு சாதாரணமாகவும் ஒருவருக்கொருவர் ஆதரவாகவும் குதூகலமாகவும் வாழ்ந்து கொண்டிருந்த மக்களெல்லாம், திடீர் திடீரென நேரடியாகக் கொள்ளையடிக்கப் பட்டும், ஏதேதோ புதுப் புது சட்டங்கள் மூலமாக சொத்துக்கள் எல்லாம் பறிக்கப் பட்டும், ஒரே நொடியில் தங்கள் இருப்பையெல்லாம் இழந்து நிர்க்கதியாகிப் போவதையெல்லாம் பரவலாகக் கண்ணுற்ற கூலிப்படையினர், அரசாங்கங்களின் மேல் மிகுந்த வெறுப்பும், சாமானிய மக்களின் மேல் மிகுந்த அனுதாபமும் கொள்ளலானார்கள். 

சாமானிய மக்களின் பரிதாப நிலைகளைப் பார்க்கும்போது தாங்கள் பெரும் போரெல்லாம் செய்து சம்பாதித்த செல்வம் எல்லாம் அவர்களுக்கு அர்த்தமில்லாததாகத் தோன்றியது. தங்கள் கையிலிருக்கும், அரசாங்கங்கள் தங்களுக்குக் கொடுத்திருப்பதாக நினைத்துக் கொண்டிருக்கும், ஒவ்வொரு காசும் மறைமுகமாக அவர்களிடமிருந்து கொள்ளையடித்ததே என்றும் உணர்ந்தார்கள். 

ஒவ்வொரு சாதாரண மனிதனின் மொத்த வாழ்நாளின் உழைப்பின் மூலம் சம்பாதித்த செல்வமும், அவர்களின் மூதாதையர்கள் அரும்பாடுபட்டு சேர்த்த செல்வமும் அரசாங்கங்களின் தயவும், கருணையும் இருந்தால்தான் காப்பாற்றப்படும் என்பதையெல்லாம் தாண்டி, அவர்கள் பணத்தையெல்லாம் சர்வ சுதந்திரமாகவும், உண்மையாகவும், அதேசமயம் ரகசியமாகவும் பாதுகாக்க வேண்டுமானால், எந்தவொரு அரசாங்கத்தின் சட்ட திட்ட கட்டமைப்பிற்குள்ளும் வராதபடிக்கு நிர்வகிக்கப்படும் ஒரு அமைப்பின் மூலமாகத்தான், அவர்களுக்கு உண்மையான புகலிடம் அளித்து, அவர்கள் நிர்க்கதியாகப் போகும் நிலையிலிருந்து அவர்களைக் காப்பாற்ற முடியும் என்று யோசித்தார்கள். 

ஆகவே சாதாரண மக்களின் செல்வத்தைப் பாதுகாப்பதற்காக முற்றிலும் மாறுபட்ட ஒரு வங்கி ஆரம்பிக்க வேண்டும் என முடிவெடுத்தார்கள்.

அவர்களில் பெரும்பாலானோர் ஸ்விட்ஸர்லாந்தைச் சேர்ந்த வர்களாக இருந்ததும், மேலும் அவர்களின் இந்த நோக்கத்திற்கும் ஸ்விட்ஸர்லாந்து தேசமே மிகவும் உசிதமாகவும் பட்டது. 

ஐரோப்பாவிலேயே அந்த ஒரு தேசம்தான் எத்தகைய நெருக்கடியிலும் சமாதானமாகப் போய் யுத்தம் கித்தங்களி லெல்லாம் ஈடுபடாமல், பல காலமாக, எந்த சண்டைக்கார தேசத்துடனும் அணி சேராமல், நடு நிலையான, சாதுவான தேசமாக இருந்தது. 

இவ்வாறாக இன்றைக்கு சுமார் முன்னூறு ஆண்டுகளுக்கு முன் அப்படிப்பட்ட, மனதளவில் அரசாங்கங்களுக்கு அடங்காத, ஆனால் சாமானிய மக்களின் மேல் கரிசனம் கொண்ட முரட்டுக் குத்தகை கூலிப்படையினர் பெருமளவில் தங்கள் கைக்காசைப் போட்டு ஆரம்பித்ததுதான் முதல் ஸ்விஸ் வங்கி. இன்று பல வங்கிகளாகப் பெருகியிருக்கிறது.

ஆரம்ப காலத்திலேயே ஸ்விட்ஸர்லாந்து மாநிலங்களின் அமைப்பு தங்களுக்குள் ஜெனிவா நகரில் கூடி, ஸ்விஸ் வங்கிகள் எக்காரணம் கொண்டும் தங்கள் அனுமதியின்றி வாடிக்கையாளர்களைக் குறித்த விவரங்களை யாரோடும் பகிர்ந்து கொள்ளக் கூடாது என்று ஒரு தீர்மானம் போட்டார்கள். 

அதன்படி ஆரம்ப முதலே இந்நாள் வரை, ஒரு மருத்துவர் எவ்வாறு தன்னுடைய நோயாளியின் அந்தரங்க விஷயங்களைப் பாதுகாப்பாரோ, ஒரு வக்கீலானவர் எவ்வாறு தன்னுடைய கட்சிக்காரரின் ரகசியத்தைப் பாதுகாப்பாரோ அதே வகையில் தங்கள் வாடிக்கையாளர்களின் ரகசியத்தைப் பாதுகாப்போம் என்று உறுதியளித்து, அந்த உறுதியின் படியே எவ்வளவோ போராட்டங்களுக்கு இடையே வாடிக்கையாளர்களின் ரகசியங்களை ஸ்விஸ் வங்கிகள் பாதுகாத்தும் வந்திருக்கின்றன. 

எந்தவொரு தேசத்திலும் ஒரு கனவான் மீது எழும் ஒரு குற்றப் புகாரை ஒட்டி, சாதாரண வங்கிகளில் உள்ள அவரின் கணக்குகளை அந்த அரசாங்கத்தால் நொடியில் முடக்கிப் போட இயலும். 

ஆனால் ஸ்விஸ் வங்கிகளில் அதெல்லாம் செய்ய இயலாது.

உலக ஊழலில் கொழுக்கும் ஸ்விஸ் வங்கிகள் - பாகம் 2 ஐத் தொடர...
பகிர்ந்து கொள்ள

வாசகர்களின் கவனத்திற்கு...

இதுபோன்ற இணையப் பக்கங்களில், ஒருவரின் பெயரில் யார் வேண்டுமானாலும் பின்னூட்ட முடியும். இதனை தடுக்கவே இங்கு பதிவிடுபவர்களின் மின்னஞ்சல் முகவரியை கேட்டுள்ளோம்.

இக்கட்டுரையின் கருத்துக்கு மாறான கருத்தை, பின்னூட்டமாக இடுவதாக இருந்தால், அதற்கான அடிப்படை ஆதாரங்களைச் சுட்டிக் காட்டியே பதிவிட கோருகிறோம். அப்போதுதான், உங்களது கருத்துக்கு மதிப்பளித்து, இப்பதிவு குறித்த கருத்துக்களை சீர்தூக்கிப் பார்த்து சீராய்வு செய்ய முடியும்.

சமூகம் இதுபோன்ற விழிப்பறிவுணர்வுகளைப் பெற வேண்டுமென நினைப்பவர்கள், இதுபற்றிய உங்களது கருத்துடன் சமூக வலைப்பக்கங்களில் பகிருங்கள்.

0 comments:

Post a Comment

Note: Only a member of this blog may post a comment.

நூல்களின் முகப்பு

நியாயந்தான் சட்டம்

Translate

Follow by Email

அடிப்படை சட்டங்கள்

  • 1. இந்திய சாசனம் 1950
  • 2. நீதிமன்ற சாசனம் 1872
  • 3. இந்திய தண்டனை சட்டம் 1860
  • 4. குற்ற விசாரணை முறை விதிகள் 1973
  • 5. உரிமையியல் விசாரணை முறை விதிகள் 1908

நம் நூல்களைப் பற்றி

நீதியைத்தேடி.... நீங்களும் நீதிமன்றத்தில் வாதாடலாம் வரிசையில்...
1 குற்ற விசாரணைகள்
2 பிணை (ஜாமீன்) எடுப்பது
எப்படி?
3 சட்ட அறிவுக்களஞ்சியம்
4 சட்டங்கள் உங்கள் பாக்கெட்டில்
5 சாட்சியங்களைச் சேகரிப்பது
எப்படி?
6 கடமையைச் செய்!
பலன் கிடைக்கும்
7 மநு வரையுங்கலை!Recent Posts Widget

இந்நூல்கள் அனைத்தும் உங்களின் சட்ட விழிப்பறிவுணர்வுக்காக
மத்திய சட்டம் மற்றும் நீதியமைச்சகத்தின் நிதியுதவியோடு
தமிழ்நாடு மற்றும் புதுச்சேரியில் உள்ள நான்காயிரத்துக்கும் மேற்பட்ட பொது நூலகங்கள், மத்திய சிறைச்சாலைகள் மற்றும் சென்னை உயர்நீதிமன்றம் உள்ளிட்ட நீதிமன்றங்களுக்கு வழங்கப்பட்டுள்ளன.

சொந்தமாக தேவைப்படுவோர், உ(ய)ரிய நன்கொடையைச் செலுத்திப் பெற்றுக் கொள்ளலாம். தொடர்பு உலாப்பேசி எண்கள் 09842909190 மற்றும் 09842399880 ஆகும்.

இப்படி, நன்கொடை செலுத்தி வாங்கிய நூல்களால் பயனில்லை என்று கருதும் பட்சத்தில், அப்படியே திருப்பி அனுப்பிவிட்டு, கொரியர் செலவுபோக மீதிப் பணத்தைப் பெற்றுக் கொள்ளலாம்.

எல்லாப் பதிகளும்!

பயின்றோர் (20-08-16)